‘हा प्रभावी उपक्रम’

पुणे : शहराच्या विविध भागांत फिरताना सर्वसामान्य नागरिकांना दिसणाऱ्या, भेडसावणाऱ्या समस्या थेट प्रशासनापर्यंत पोहोचविण्यासाठी ‘महाराष्ट्र टाइम्स’ने सुरू केलेला ‘सिटीझन रिपोर्टर’ हा प्रभावी उपक्रम असल्याची भावना उपक्रमात सहभागी झालेल्या नागरिकांनी शुक्रवारी व्यक्त केली.

‘सिटीझन रिपोर्टर’द्वारे गेल्या आठवड्यात उल्लेखनीय वार्तांकन केलेल्या वैजयंती काळे, महेश भोसले, मनोज पिल्ले आणि समाधान खरात यांचा ‘मटा’तर्फे प्रातिनिधिक सत्कार करण्यात आला. ‘हा अत्यंत प्रभावी उपक्रम असून, त्याद्वारे नागरी प्रश्न सोडविण्यास मदत होणार आहे. या अॅपमुळे सार्वजनिक समस्या वर्तमानपत्रातून अनेकांपर्यंत पोहोचतात. प्रसिद्धीनंतर प्रशासनाकडून त्याची त्वरित दखल घेतली जाते आहे,’ अशी भावना त्यांनी व्यक्त केली.

‘मटा’च्या या उपक्रमामुळे सर्वसामान्य माणसातील बातमीदाराला प्रोत्साहन मिळते आहे. यामुळे शहरात कुठेही फिरताना आम्ही समस्या टिपायला लागलो आहोत,’ असे मत खरात यांनी व्यक्त केले. या उपक्रमामध्ये बातमी दिल्यानंतर झालेल्या इम्पॅक्टचीही माहिती त्यांनी या वेळी दिली. स्थानिक प्रशासकीय कर्मचाऱ्यांकडे पाठपुरावा करूनही जी कामे झाली नाही ती सिटीझन रिपोर्टरमध्ये वृत्त प्रसिद्ध झाल्यावर होत आहेत, असे उपस्थितांनी सांगितले.