‘मटा’मुळे नागरिक लिहिते झाले

म. टा. प्रतिनिधी, नगर
‘एरवी समस्या दिसल्या तरी दुर्लक्ष करण्याची नागरिकांची सवय. मात्र, आता ‘महाराष्ट्र टाइम्स’चे ‘सिटीझन रिपोर्टर’ अॅप्लिकेशन आल्यापासून नागरिक लिहिते व बोलते झाले आहेत,’ असे मत ‘सिटीझन रिपोर्टर’ बनलेल्या नागरिकांनी व्यक्त केले.

गेल्या आठवड्यात उल्लेखनीय काम केलेले ज्ञानेश्वर मंगलारम, प्रा. सतीश शिर्के आणि डॉ. महेश चौरे यांचा शुक्रवारी ‘म.टा.’ कार्यालयात सत्कार करण्यात आला. यातील मंगलारम या आठवड्यातील ‘बेस्ट सिटीझन रिपोर्टर’ ठरले.

मंगलारम सामाजिक कार्यकर्ते आहेत. ते म्हणाले, ‘या उपक्रमामुळे प्रश्न मांडणे सोपे झाले. अनेकदा रस्त्याने जाताना एखादा विषय दिसला की पुढे गेल्यावरही मागे येऊन त्याचा फोटो काढावा असे वाटते. हा कॉलम रोज वाचल्यानंतर शहरात एवढ्या समस्या आहेत आणि त्या मांडण्यासाठी नागरिक पुढे येत आहेत, हे लक्षात येते.’

शिर्के प्राध्यापक असून लेखकही आहेत. ते म्हणाले, ‘या उपक्रमामुळे नागरिकांना चांगली संधी मिळाली आहे. सामाजिक विषयांनाही यातून स्थान मिळाले पाहिजे. समाजप्रबोधनासाठी हे एक प्रभावी माध्यम ठरणार आहे.’

डॉ. चौरे डॉक्टर असून सिद्धार्थनगर भागात त्यांचा दवाखाना आहे. ते म्हणाले, ‘रस्त्याने जाता येता दिसणाऱ्या समस्या यातून मांडता येतात. प्रश्नांकडे पाहण्याचा दृष्टीकोन यामुळे बदलला आहे. तंत्रज्ञानाचा योग्य वापर करून ‘मटा’ने हे नवे नेटवर्क उभारले असून त्याचा शहराला नक्कीच फायदा होईल.’