महावितरणचा अजब फंडा, ग्राहकांना गंडा!

महावितरण कंपनीने आता वीजग्राहकांना एसएमएस पाठवून मीटर रीडिंगचा फोटो पाठविण्याच्या सूचना दिल्या आहेत. मीटर रीडिंग घेणारा कर्मचारी यापूर्वीदेखील कधी नियमितपणे येत नव्हता व आता तो येतच नाही. त्यामुळे रीडिंगच्या तारखेनंतर एका आठवड्याने महावितरणचा मोबाइलवर मेसेज येतो, की दोन दिवसांत ग्राहकाने मीटर रीडिंगचा फोटो काढून महावितरणच्या अॅपद्वारे अपलोड करावा. त्यासाठी महावितरण अॅप मोबाइलवर डाउनलोड करावे लागते. त्यावर रजिस्टर करावे लागते. सेटिंग चेंज करावे लागते. मग मीटरचा फोटो काढून अपलोड करावा लागतो. यासाठी इंटरनेट असावे लागते. त्याखेरीज ग्राहकांना या सर्वाचे ज्ञान असणेही गरजेचे आहे! एकंदरीतच हा अजब फंडा काढून महावितरण कंपनीने ग्राहकांना गंडा घालण्याचा व आपल्या रीडिंग घेणाऱ्या कर्मचाऱ्यांना मोकाट सोडण्याचा प्रकार केला आहे. तेव्हा हा अजब फंडा बंद करून कर्मचारीवर्गास वेळेवर रीडिंग घेण्याची सक्ती करावी.

- दिलीप सांगळे