वसईत पार्किंगवरून वाद; शेजाऱ्यांनी मरेपर्यंत मारलं

वसई: पश्चिमेकडील तहसील कार्यालयाजवळील एका सोसायटीत पार्किंगवरून झालेल्या वादातून शेजारच्या तिघांनी एका व्यक्तीची बेदम मारहाण करून हत्या केली. शनिवारी दुपारी ही घटना घडली. मारहाण होत असताना, सोसायटीतील अन्य लोकांनी केवळ बघ्याची भूमिका घेतल्याचं सांगितलं जातं.

वसई पश्चिमेकडील तहसील कार्यालयाच्या मागील बाजूस साई सृष्टी अपार्टमेंट आहे. या इमारतीतील रहिवासी महेश बडगुजर (वय ४३) शनिवारी दुपारी एक वाजता विद्या संजय शिंदे यांच्या सोबत कारमधून इमारतीत आले. बडगुजर यांनी कार सी विंगच्या समोर पार्क केली. त्याचवेळी इमारतीत राहणारे सुभाष राठोड, त्यांची पत्नी अंजना आणि हेमंत जयप्रकाश चव्हाण यांनी कार पार्क करण्यास विरोध केला. यावरून त्यांच्यात जोरदार भांडण झाले. या भांडणाचं पर्यावसन हाणामारीत झालं. राठोड, त्याची पत्नी आणि चव्हाण या तिघांनी बडगुजर यांना लाथाबुक्क्यांनी आणि दंडुक्यानं बेदम मारहाण केली. त्यावेळी बडगुजर यांच्यासोबत असलेल्या विद्या यांनी सोसायटीतील इतर लोकांकडे मदत मागितली. मात्र, सर्वांनी बघ्याची भूमिका घेतली. कुणीही मदतीसाठी पुढे आलं नाही. तिघांनी बडगुजर यांना बेदम मारहाण केली. काही वेळानंतर विद्या यांनी बडगुजरना घरी नेले. घरी गेल्यानंतर त्यांना उलट्या होऊ लागल्या. त्यांना जवळच्या सरकारी रुग्णालयात नेण्यात आलं. तिथे काही वेळानंतरच बडगुजर यांचा मृत्यू झाला. पोलिसांनी या प्रकरणी गुन्हा नोंदवून आरोपी सुभाष राठोड, पत्नी अंजना आणि हेमंत चव्हाण यांना अटक केली.

रविवारी आरोपींना वसईच्या न्यायालयात हजर केलं असता, त्यांना शुक्रवारपर्यंत पोलीस कोठडी सुनावली आहे.

जेरबंद केलेल्या बिबट्याचा मृत्यू

जोधपूर येथे मृत्यू झालेल्या महिलेवर अंत्यसंस्कार