मुंबई पोलिसांची डोकेदुखी वाढली; 'मॉर्निंग शिफ्ट'वाल्या टोळीचा धुमाकूळ; सावध राहा!

मुंबई: शहरात एका नव्या टोळीनं धुमाकूळ घातला आहे. दोन महिला, एक मुलगा आणि एका मुलीचा समावेश या टोळीत आहे. सकाळच्या सुमारास ही टोळी सक्रिय होते आणि अनेक घरांमधून मोबाईल, मौल्यवान वस्तू लांबवते. गेल्या काही आठवड्यांत दादर आणि भायखळ्यात टोळीनं अनेक ठिकाणी हात साफ केल्याची माहिती पोलिसांना दिली.

सकाळी ६ ते ८ च्या दरम्यान अनेक घरांची दारं उघडी असतात. या कालावधीत दूधवाले, पेपरवाले येतात. कचरा गोळा कर्मचारी कचरा घेऊन जातात. यासाठी अनेक घरांचे दरवाजे सकाळचे काही तास उघडे असतात. त्याचाच फायदा ही टोळी घेते. सोमवारी रात्री दादर पोलिसांनी एका महिलेला अटक केली. ही महिला या टोळीची प्रमुख असल्याचा संशय पोलिसांना आहे.
मंगळवारी मटण का करताय? नवरा-बायकोचं कडाक्याचं भांडण; दोघांच्या वादात शेजाऱ्याचा जीव गेला
टोळीतील महिलेचं वय पस्तीसच्या आसपास आहे. तरुणीचं वय १८ ते २० वर्षांदरम्यान आहे. टोळीत १० वर्षांचा मुलगादेखील आहे. याशिवाय टोळीत १० ते १२ वर्षांची मुलगी आहे. सुरक्षा रक्षक नसलेल्या सोसायटी आणि चाळींमधील घरांना ही टोळी लक्ष्य करते.

सकाळच्या सुमारास पेपरवाले, दूधवाले येतात. कचरा गोळा करणारे कर्मचारी येतात. त्यासाठी अनेकजण दरवाजे उघडे ठेवतात. त्याचाच गैरफायदा टोळीकडून घेतला जातो, अशी माहिती पोलीस अधिकाऱ्यांनी दिली. घरचा दरवाजा उघडा असला तरी कुटुंबातील बरेचसे सदस्य झोपलेले असतात किंवा दुसऱ्या खोलीत असतात. अशा घरात या टोळीतले काही जण शिरतात आणि मोबाईल, रोकड, मौल्यवान वस्तू घेऊन पळ काढतात, असं त्यांनी सांगितलं.
शेजारच्या घरातून दुर्गंधी येतेय! पोलिसांना कॉल, घटनास्थळ गाठलं, दरवाजा तोडला अन् मग...
टोळीनं ऑक्टोबरमध्ये दादर, प्रभादेवी, भोईवाडा, लालबाग, काळाचौकी परिसरातील घरांमध्ये चोऱ्या केल्या आहेत. या टोळीचा एक फोटो पोलिसांच्या हाती लागला आहे. सीसीटीव्हीत ही टोळी कैद झाली आहे. त्यांचा फोटो पोलिसांनी इतरांसोबत शेअर केला आहे.