पतीची हत्या करून पत्नीनं घरातच मृतदेह गाडला; शेजाऱ्यांना संशय अन् चार दिवसांनंतर अचानक...

शाहजहापूर: उत्तर प्रदेशच्या शहाजहापूरमध्ये एक धक्कादायक घटना उघडकीस आली आहे. एका महिलेनं पतीची हत्या केली. यानंतर महिलेनं घरातच खड्डा खणून पतीचा मृतदेह गाडला. अवैध संबंधांतून ही हत्या करण्यात आल्याचं सांगितलं जात आहे. सध्या या प्रकरणाचा तपास पोलिसांकडून सुरू आहे.

पोलिसांनी घरातील खड्ड्यातून पतीचा मृतदेह ताब्यात घेतला आहे. आरोपी पत्नीला अटक करण्यात आली आहे. पोलीस या प्रकरणात पुढील कारवाई करत आहेत. खमरिया गावात ही घटना घडली. गोविंद यांच्या घरातून गुरुवारी दुर्गंध येऊ लागला. याची माहिती शेजारच्या लोकांनी पोलिसांना दिली. पोलीस गोविंदच्या घरी पोहोचले. त्यावेळी तिथे त्यांना कबर दिसली.
जिथे कन्हैयालालची हत्या, तिथेच मोहरमच्या मिरवणुकीत ताजिया पेटला; हिंदू कुटुंबाने...
पोलिसांनी गोविंदची पत्नी शिल्पीची चौकशी केली. कबरीमध्ये गोविंदचा मृतदेह असल्याचं तिनं सांगितलं. पतीनं आत्महत्या केली होती. त्यानंतर त्याचा मृतदेह घरातच खड्डा खणून पुरला, असं शिल्पीनं सांगितलं. शिल्पीनं तिच्या साथीदारासह गोविंदची हत्या करून त्याचा मृतदेह घरातच गाडला असल्याचा आरोप गोविंदच्या कुटुंबियांनी केला. पोलिसांनी गोविंदचा मृतदेह शवविच्छेदनासाठी पाठवला आहे.

पोलिसांनी शिल्पीला ताब्यात घेतलं आहे. ७ ऑगस्टला शिल्पी आणि गोविंद यांचं भांडण झालं. त्यानंतर गोविंद बेपत्ता झाला. त्यानंतर ५ दिवसांनी गोविंदचा मृतदेह त्याच्याच घरात आढळून आला आहे. गोविंदची हत्या नेमकी कशी करण्यात आली ते शवविच्छेदन अहवाल आल्यानंतर स्पष्ट होईल.