शेततळ्यात विषप्रयोग; कोंबडा जातीच्या हजारो मृत माशांचा खच

अहमदनगर: शेततळ्यात विषारी पदार्थ टाकून तब्बल पाच लाख रुपये किंमतीचे हजारो मासे मारल्याचा धक्कादायक प्रकार श्रीरामपूर तालुक्यातील भेंर्डापूर या गावात घडला आहे. या प्रकरणी अज्ञात व्यक्तीविरोधात गुन्हा दाखल करण्यात आला आहे.

१ जून ते ४ जून या कालावधीत हा धक्कादायक प्रकार घडला आहे. या प्रकरणी काल, शनिवारी रात्री अज्ञात व्यक्तीच्या विरोधात श्रीरामपूर तालुका पोलीस ठाण्यात गुन्हा दाखल करण्यात आला आहे. भेर्डापूर येथे नीलेश पंडित कवडे हे स्वतःच्या शेततळ्यात मत्सपालनाचा व्यवसाय करतात. कवडे यांनी कोंबडा जातीचे मासे हे शेततळ्यात सोडले होते. हे मासे जवळपास पाच लाख रुपये किंमतीचे होते. मात्र, अज्ञात व्यक्तीने कवडे यांच्या शेततळ्यात विषारी पदार्थ टाकला. या पदार्थामुळे शेततळ्यातील सर्व मासे हे मृत्युमुखी पडले. अज्ञात व्यक्तीवर शेततळ्यात विषारी पदार्थ टाकून मत्स्यहानी करून नुकसान केल्याप्रकरणी श्रीरामपूर तालुका पोलीस ठाण्यात गुन्हा दाखल करण्यात आला आहे.

मृत माशांची तपासणी नाशिकच्या प्रयोगशाळेत

दरम्यान, या शेततळ्यात सुमारे २५ हजार मासे हे सहा महिन्यांपूर्वी सोडण्यात आले होते. आजमितीस या माशांची पूर्ण वाढ झाली होती. मात्र, विषारी पदार्थ तळ्यात टाकल्याने त्यांचा मृत्यू झाला. यामुळे मोठे नुकसान झाले आहे. या घटनेची माहिती मिळताच कृषी व महसूल विभागाच्या कर्मचाऱ्यांनी घटनास्थळी भेट दिली व नुकसानीचा पंचनामा केला. तसेच आता शेततळ्यातील पाणी व मृत मासे हे नाशिक येथील प्रयोगशाळेत तपासणीसाठी पाठवण्यात येणार आहेत.

पुणे: महिलेनं बॉयफ्रेंडच्या मदतीनं स्वतःच्या घरातच केली चोरी

मुंबई: पैसे निघाले नाहीत, कार्ड अडकलं; 'त्यानं' रागानं ATMच फोडलं