औरंगाबाद : अल्पवयीन मुलीवर जवळच्या नातेवाइकाकडून अत्याचार

औरंगाबाद : मावस भावाच्या वाढदिवसासाठी गेलेल्या सतरा वर्षीय बालिकेवर मावशीच्या दिराने अत्याचार केल्याचे उघड झाले. हा प्रकार २८ डिसेंबर २०२० ते २९ जानेवारी २०२१ याकाळात पडेगाव परिसरात घडला. छावणी पोलिसांनी २६ वर्षीय तरुणाला अटक केली आहे.

हडको भागातील पीडीता २८ डिसेंबर रोजी पडेगावातील तारांगण कासलीवाल येथे मावशीला भेटण्यासाठी गेली होती. त्यानंतर दुसऱ्या दिवशी दोन वर्षीय मावस भावाचा वाढदिवस असल्याने ती मावशीकडेच मुक्कामी थांबली. त्यावेळी मावशीचा २६ वर्षीय दिरही तेथे आला होता. त्याने पीडितेचे लैंगिक शोषण केले. त्यातूनच ती गर्भवती राहिली. पोटदुखीचा त्रास होत असल्याने तिला बुलडाणा येथील एका खासगी रुग्णालयात २३ मार्च रोजी तपासणीसाठी नेले. त्यावेळी ती गर्भवती असल्याचे समोर आले. त्यामुळे कुटुंबीयांना प्रचंड धक्का बसला. त्यांनी विचारणा केल्यावर तिने घडलेला प्रकार सांगितला. त्यावरुन बुलडाणा ग्रामीण पोलिस ठाण्यात गुन्हा नोंदवून छावणी पोलिसात वर्ग करण्यात आल्याचे पोलिसांनी सांगितले. या प्रकरणाचा पुढील तपास उपनिरीक्षक पुंडलिक डाके करीत आहेत.