कुख्यात डॉन अरुण गवळीला पॅरोल मंजूर

नागपूर : अंडरवर्ल्ड डॉन अरुण गवळी ऊर्फ डॅडी याने पुन्हा एकदा पॅरोलसाठी (रजेसाठी) उच्च न्यायालयाच्या नागपूर खंडपीठात याचिका दाखल केली. न्या. झका हक आणि न्या. अमित बोरकर यांनी रजा मंजूर केली. शिवसेना नेत्याच्या खुनात डॅडीला जन्मठेपेची शिक्षा ठोठावण्यात आली असून तो सध्या नागपूर मध्यवर्ती कारागृहात आहे. पत्नी आजारी असल्याने त्याने पॅरोलसाठी विभागीय आयुक्तांकडे अर्ज केला होता. विभागीय आयुक्तांनी रजा नाकारल्यानंतर त्याने उच्च न्यायालयाच्या नागपूर खंडपीठात धाव घेतली. या याचिकेवर यापूर्वी सुनावणी झाली असता १८ मार्चला न्यायालयाने राज्य सरकार व मुंबई पोलिसांना नोटीस बजावली होती. त्यानंतर राज्य सरकारने उत्तर दाखल करताच उच्च न्यायालयाने पत्नीच्या आरोग्याच्या कारणासाठी रजा मंजूर केली. गवळीतर्फे अ‍ॅड. मीर नगमान अली यांनी बाजू मांडली.

दुकान फोडले

नागपूर : दत्तनगर परिसरात दुकान फोडून दुकानातील एक लाख रुपयांचा ऐवज लंपास करण्यात आला. ही घटना गुरुवारी सका‌ळी १० वाजताच्या सुमारास उघडकीस आली. पंकज मुरलीधर राठी (वय ४३) यांचे या परिसरात टायरचे दुकान आहे. दुकानाचे शटर तोडून चोरटे दुकानात घुसले. दुकानातील रोख रक्कम आणि इतर साहित्य असा एकूण १ लाख १२ हजार रुपयांचा ऐवज चोरट्यांनी लंपास केला. याप्रकरणी इमामवाडा पोलिसांनी घरफोडीचा गुन्हा दाखल केला आहे.

मुलीवर अत्याचार

नागपूर : अल्पवयीन मुलीला लग्नाचे आमिष दाखवत तिला फूस लावून पळवून नेणाऱ्यावर अत्याचाराचा गुन्हा दाखल करण्यात आला आहे. सोहन देवचंद जगणे (वय २५, रा. बालाघाट) असे या आरोपीचे नाव आहे. त्याने सतरावर्षीय मुलीला लग्नाचे आमिष दाखवून पळवून नेले. तिच्याशी शारीरिक संबंधही प्रस्थापित केले. या मुलीच्या पालकांनी दिलेल्या तक्रारीच्या पारडी पोलिसांनी आरोपीवर गुन्हे दाखल केलेत.

शेजाऱ्याने केला विनयभंग

नागपूर : शेजारीच राहणाऱ्या अल्पवयीन मुलीचा विनयभंग केल्याच्या आरोपाखाली तरुणास अटक करण्यात आली आहे. बादल भारत भालेराव (२२) असे आरोपीचे नाव आहे. त्याच्याच परिसरातील एका अल्पवयीन मुलीचा विनयभंग केल्याचा आरोप त्याच्यावर लावण्यात आला आहे. गिट्टीखदान पोलिसांनी याप्रकरणी त्याच्यावर गुन्हा दाखल करून त्याला अटक केली आहे.