पिकनिकचा निम्मा खर्च कर! गुरुजींचा नकार; तीन मित्र संतापले, शिक्षकाला मारुन विहिरीत फेकले

गाझियाबाद: सरकारी शाळेतील शिक्षकाच्या हत्येप्रकरणी पोलिसांनी तिघांना अटक केली आहे. २५ ऑगस्टला मुरादनगरच्या जंगलातील विहिरीत शिक्षकाचा मृतदेह आढळून आला. आदेश त्यागी असं शिक्षकाचं नाव आहे. मृतदेहाची ओळख पटल्यानंतर पोलिसांनी तपास सुरू केला. नोकरीच्या निमित्तानं त्यागी एकटेच गाझियाबादमध्ये वास्तव्यास होते. ते एका सरकारी प्राथमिक शाळेत शिक्षक म्हणून कार्यरत होते.

सहलीचा निम्मा खर्च उचलण्यास नकार दिल्यानं आदेश त्यागींची हत्या करण्यात आली. मुरादनगरमध्ये असलेल्या विहिरीतून दुर्गंधी येत असल्याची माहिती एका व्यक्तीनं पोलिसांना दिली. त्यानंतर पोलीस घटनास्थळी पोहोचले. त्यांना एक मृतदेह सापडला. पोलिसांनी मृतदेहाची ओळख पटवली. तो मृतदेह प्राथमिक शाळेत शिक्षक असलेल्या आदेश त्यागी यांचा असल्याचं चौकशीतून समजलं. पोलिसांनी त्यांच्या कुटुंबियांशी संपर्क साधला. आदेश यांच्याशी १५-२० दिवसांतून एकदाच संपर्क व्हायचा. त्यामुळे त्यांच्या हत्येची कोणतीच माहिती नसल्याचं कुटुंबियांनी सांगितलं.
महिन्याभरात लग्न मोडलं, मग लिव्ह-इन पार्टनरनं संपवलं; गर्भवती नर्सच्या आत्महत्येचा बनाव
त्यागी यांचा मृत्यू बुडाल्यामुळे झाल्याचं शवविच्छेदन अहवालातून समोर आलं. त्यामुळे हे प्रकरण आत्महत्येचं असल्याचं पोलिसांना वाटलं. मात्र त्यांचे कॉल रेकॉर्ड तपासल्यानंतर वेगळीच माहिती उघडकीस येऊ लागली. फोन स्विच्ड ऑफ होण्यापूर्वी आदेश यांनी त्यांच्या मित्रांशी कमीत कमी १० वेळा संवाद साधल्यानं रेकॉर्डवरून उघड झालं.

आदेश त्यागी यांच्या मृत्यूनंतर त्यांचे मित्र सौरभ सिंह, नवरतन सिंह, मोनू कुमार आणि गौरव कुमार फरार असल्याची माहिती पोलिसांना मिळाली. शुक्रवारी सकाळी यापैकी तिघांना ताब्यात घेण्यात आलं. त्यांना पोलिसी खाक्या दाखवण्यात आला. त्यांनी हत्या केल्याचं कबूल केलं. १३ ऑगस्टला आदेश दारू पार्टीसाठी सौरभच्या घरी गेले होते. तिथे मित्रांनी राजस्थानमधील बागरला फिरायला जायची योजना आखली.
सैराटची पुनरावृत्ती टळली! बहिणीच्या पतीला मारण्यासाठी मालकाची कार विकली, बंदूक घेतली, पण...
राजस्थान सहलीचा निम्मा खर्च आदेश यांनी करावा, असं मित्रांनी सांगितलं. मात्र आदेश यांनी त्यास नकार दिला. त्यावरून वाद झाला. प्रकरण मारहाणीपर्यंत गेलं. यादरम्यान मोनू, नवरतन आणि गौरव यांनी आदेश यांना पकडलं आणि सौरभनं त्यांच्या डोक्यात दांडा घातला. त्यामुळे आदेश बेशुद्ध पडले. आदेश यांचा मृत्यू झाल्याचं आरोपींना वाटलं. त्यांनी आदेशला जंगलातील एका विहिरीत फेकलं. या प्रकरणातील एक आरोपी मोनू फरार आहे. त्याचा शोध सुरू आहे.