सेल्फी पडला ६० हजार रुपयांना; नवरदेवाच्या आईचे दागिने चोरीला

म. टा. वृत्तसेवा नाशिकरोड: पुतण्याच्या लग्नासाठी आलेल्या चुलत्याकडील ब्रिफकेसमध्ये ठेवण्यासाठी दिलेले नवरदेवाच्या आईचे ६० हजार रुपये किमतीचे २० ग्रॅम वजनाचे सोन्याचे दागिने लॉन्समधून चोरीस गेल्याची घटना रविवारी दुपारी जेलरोडच्या भगवती लॉन्स येथे घडली. या घटनेतील चोरट्यांनी लहान मुलाच्या हातून चोरी करून कारमधून पोबारा केल्याचे सीसीटीव्ही फुटेजमधून उघड झाले आहे.

शिवाजी खरे (वय ५२, रा. टिटवाळा) यांनी नाशिकरोड पोलिस ठाण्यात फिर्याद दिली आहे. शिवाजी खरे हे पुतण्या सागर याच्या लग्नासाठी भगवती लॉन्स येथे आलेले होते. नवरदेवाच्या आईचे सात ग्रॅम वजनाचे २१ हजार रुपये किमतीचे कर्णफुले, पाच ग्रॅम वजनाचे १५ हजार रुपये किमतीचे वेल आणि २४ हजार रुपयांची आठ ग्रॅम वजनाची सोन्याची चेन असे एकूण ६० हजार रुपये किमतीचे सोन्याचे दागिने शिवाजी खरे यांच्याकडे ठेवण्यासाठी दिलेले होते.

लग्नानंतर लॉन्सवर नातेवाईक सेल्फी काढण्यासाठी आले असता, खरे यांनी हातातील ब्रिफकेस बसलेल्या सोफा सेटवर ठेवली आणि सेल्फीसाठी उभे राहिले. सेल्फी काढून झाल्यावर पुन्हा सोफासेटवर बसले असता, त्यांना ब्रिफकेस जागेवर मिळून आली नाही. शोध घेऊनही ब्रिफकेस मिळून न आल्याने अखेरीस त्यांनी लॉन्समधील सीसीटीव्ही फुटेज तपासले असता, सेल्फी काढतेवेळी आलेला एक लहान मुलगा ब्रिफकेस उचलून लॉन्सबाहेर जाताना दिसला. लॉन्सबाहेर तो आणि त्याचा साथीदार असे दोघेजण रस्ता ओलांडून गेल्यावर तिथे येऊन थांबलेल्या कारमध्ये बसून निघून घेल्याचे या फुटेजमध्ये दिसून आले.

बायकोला हायफाय राहायला आवडायचं, हौस पुरवण्यासाठी 'तो' बनला चोर

शिक्षिका इव्हीनिंग वॉकसाठी बाहेर पडली; समोरून बाइकस्वार आला अन्...

८ महिन्यांपूर्वीच झालं होतं लग्न, ‘सेल्फी’च्या नादात गोदावरी नदीत पडून मृत्यू