उल्हासनगरात गुटख्यासह १६ लाखांचा मुद्देमाल जप्त; पाच जणांना अटक

म. टा. वृत्तसेवा, उल्हासनगर : गुटखा साठेबाजीसाठी चर्चेत असणाऱ्या उल्हासनगरमध्ये अन्न आणि औषध प्रशासन विभाग आणि विठ्ठलवाडी पोलिसांनी संयुक्त कारवाई करत चार वाहनांतून १५ लाख ८० हजार रुपयांचा प्रतिबंध असलेला गुटख्याचा साठा जप्त केला आहे. या प्रकरणी गुटखा माफिया म्हणून कुख्यात असलेल्या दिलीप वलेच्छा आणि निलेश डिंगरा यांच्यासह चार वाहनचालकांना पोलिसांनी अटक केली आहे.

राज्य शासनाकडून राज्यात गुटखा खरेदी आणि विक्रीवर प्रतिबंध असताना उल्हासनगर शहरात मात्र सातत्याने गुटख्याचा बेकायदा साठा आणि विक्री केली जात असल्याची प्रकरणे समोर येत आहेत. विठ्ठलवाडी पोलिस स्टेशनच्या हद्दीत गुरूसंगत दरबारजवळ मोठ्या प्रमाणात अवजड वाहनांतून गुटखा आणला जातो. त्यानंतर हा गुटख्याचा साठा लहान वाहनांतून शहरात विविध ठिकाणी छुप्या पद्धतीने विक्री केला जात असल्याची गुप्त माहिती अन्न आणि औषध विभागाच्या दक्षता आणि गुप्तवार्ता पथकाला मिळाली होती. या माहितीच्या आधारे गुरूसंगत दरबारजवळ सहआयुक्त समाधान पवार, सहाय्यक आयुक्त रमेश जाधव आणि गुप्तवार्ता आणि दक्षता विभागाच्या अन्न सुरक्षा अधिकारी अरुणा विरकायदे यांच्या पथकाने विठ्ठलवाडी पोलिसांच्या मदतीने सापळा रचून या ठिकाणी छापा टाकला. यावेळी गोदामामधील दोन जणांनी घटनास्थळावरून पळ काढला. दिलीप वलेच्छा आणि निलेश डिंगरा यांच्यासह नगर येथून उल्हासनगरात गुटख्याची वाहतूक करणारे वाहनचालक दत्तात्रय एकशिंगे, जयेश गुलाबानी, सोमनाथ फुलमाळी यांना पोलिसांनी अटक केली आहे.

या छाप्यात गुटख्याच्या साठ्याने भरलेली एक इनोव्हा कार, एक चालचाकी वाहन, एक आयशर टेम्पो, एक लहान टेम्पो अशी चार वाहने जप्त करण्यात आली आहेत. यातील एका वाहनात सहा लाख ३७ हजार रुपये किंमतीची शुद्ध पान मसाल्याची तीन हजार ४५४ पाकिटे, तर दुसऱ्या वाहनातून पाच लाख २४ हजार रुपये किंमतीची केसरयुक्त विमल पान मसाल्याची एक हजार ८७२ पाकिटे, इतर दोन वाहनांत एक लाख आणि ८७ हजार रुपये किंमतीची तीन हजार ९५२ तंबाखूची पाकिटे पोलिसांना आढळून आली आहेत. या छाप्यात एकूण १५ लाख ८० हजार २७२ रुपयांचा मुद्देमाल पोलिसांनी जप्त करत आरोपींविरोधात विठ्ठलवाडी पोलिस स्टेशनमध्ये गुन्हा दाखल केला आहे. मात्र, बंदी असतानाही एवढ्या मोठ्या प्रमाणात गुटखा आणि तंबाखूजन्य पदार्थांची वाहतूक आणि वितरण होत असल्याने चेक नाक्यावरील नाकाबंदीबाबतही सवाल उपस्थित केले जात आहेत.