दोन महिन्यांपूर्वी नोकरीला, ATM कॅश व्हॅन चालक पावणे ३ कोटींसह पळाला, लोकेशन कळलं, पण...

मुंबई: एटीएममध्ये रोकड भरणाऱ्या व्हॅनचा चालक तब्बल २.८ कोटी रुपये घेऊन फरार झाल्याची घटना घडली आहे. एटीएममध्ये भरण्यासाठी देण्यात आलेली रोख घेऊन चालक फरार झाला. मुंबई उपनगरातील गोरेगावात ही घटना घडली. सध्या पोलीस या चालकाचा शोध घेत आहेत.

उदयभान सिंह (वय ३४ वर्षे) एटीएममध्ये रोकड भरणाऱ्या व्हॅनवर दोन महिन्यांपूर्वीच कामाला लागला. सोमवारी दुपारी १२ ते १ च्या दरम्यान तो कंपनीतील त्याच्या सहकाऱ्यांना घेऊन निघाला. गोरेगाव पश्चिमेकडे असलेल्या एका बँकेच्या एटीएममध्ये रोकड भरण्याची जबाबदारी त्यांच्यावर होती.
अंधेरीत खून, मृतदेह बॅगेत टाकून लोकल प्रवास; नायगावात बॅग फेकली, वैष्णोदेवी गाठली अन् मग...
कॅश व्हॅन बँकेजवळ थांबल्यावर उदयभानचे सहकारी रोकड भरण्यासाठी खाली उतरले. ते काम आटपून परतले, तेव्हा उदयभान तिथे नव्हता. उदयभान व्हॅन घेऊन तिथून गेला होता. त्यांनी उदयभानला वारंवार फोन केले. मात्र त्यानं प्रतिसाद दिला नाही. यानंतर त्यांनी जीपीएसच्या माध्यमातून उदयभानचं लोकेशन शोधलं. ते गोरेगावातल्याच पिरामल नगर येथे होतं. उदयभान तिथे थांबल्याचं लोकेशनवरून समजलं.
ड्युटीवर झोपला की संपला! वॉचमनवर हल्ले करणारा सीरियल किलर; ७२ तासांत ३ हत्या
व्हॅनवर काम करणाऱ्या कर्मचाऱ्यांनी घटनेची माहिती वरिष्ठांना दिली. त्यांनी याची माहिती पोलिसांना कळवली. यानंतर पोलिसांनी पिरामल नगर गाठलं. तिथे पोलिसांना व्हॅन सापडली. मात्र त्यामध्ये २.८ कोटी रुपये नव्हते. सिंहच्या शोधासाठी पोलिसांनी ३ पथकं तयार केली आहेत. सिंहचे फोन रेकॉर्ड्स, परिसरातील सीसीटीव्हीदेखील तपासले जात आहेत.