संदीप कोरगावकरची आत्महत्या; पोलिसांनी चक्रं फिरवली अन् तब्बल ३०० कोटींचा घोटाळा उघड

मुंबई: लोन ऍपच्या माध्यमातून लोकांची फसवणूक करणाऱ्या टोळीचा पर्दाफाश पोलिसांनी केला आहे. या प्रकरणी १४ जणांना अटक करण्यात आली आहे. जून आणि जुलै महिन्यात पोलिसांनी धडक कारवाया केल्या. त्यातून ३०० ते ३५० कोटींचा घोटाळा उघडकीस आला. अटक करण्यात आलेल्या १४ जणांपैकी ६ जण क्रिप्टो करन्सीचा वापर करत असल्याची माहिती पुढे आली आहे.

गेल्या वर्षभरापासून हजारो लोकांना लोन ऍप्सच्या माध्यमातून गंडा घालण्यात आला. त्यामुळे रिझर्व्ह बँक ऑफ इंडियाला नवी मार्गदर्शक तत्त्वं आणि सूचना जारी कराव्या लागल्या. हा संपूर्ण घोटाळा उघडकीस आणण्यात मुंबईतील एक घटना महत्त्वाची ठरली. ४ मे रोजी मुंबईच्या मालाडमध्ये एका सेल्समननं आत्महत्या केली. संदीप कोरगावकर (वय ३८ वर्षे) असं सेल्समनचं नाव होतं. कर्जवसुली करणाऱ्या एजंट्सनी केलेल्या छळाला कंटाळून मानसिक विवंचनेतून कोरगावकर यांनी आत्महत्या केली.
...तर तुमचे 'ते' फोटो नातेवाईकांना दाखवेन! सूड घेण्यासाठी नोकराचा डॉक्टरला कॉल अन् मग...
आरोपीनं कोरगावकर यांना ५० पेक्षा अधिक वेळा कॉल केला. लोन वसुली करणाऱ्या व्यक्तीनं कोरगावरकर यांना त्यांचे मॉर्फ्ड करण्यात आलेले आक्षेपार्ह फोटो पाठवले. पैसे न दिल्यास तुमचे फोटो तुमच्या परिसरातील लोकांना आणि सहकाऱ्यांना पाठवू, अशी धमकी देत आरोपीनं कोरगावकरांना ब्लॅकमेलिंग केलं. आत्महत्या करण्यापूर्वी कोरगावकर यांनी कुरार पोलीस ठाण्यात तक्रार दाखल केली. कोरगावकर यांच्या आत्महत्येनंतर सायबर पोलिसांनी लोन ऍपच्या माध्यमातून होणाऱ्या फसवणुकीचा तपास सुरू केला.
धक्कादायक! १० वर्षांची लेक साखरझोपेत होती, आईनं फासाला लटकावलं अन् मग...
एका व्यक्तीनं १० ऍप्सच्या माध्यमातून ३.८५ लाख रुपयांचं कर्ज घेतलं होतं. कोरगावकर यांच्याप्रमाणेच या व्यक्तीलादेखील जवळपास ५० वेगवेगळ्या क्रमांकावरून फोन आले. वसुली एजंट्सनी त्याच्याकडून १५ लाख रुपये उकळले. या प्रकरणाचा तपास हाती घेत सायबर पोलिसांनी सुधाकर रेड्डीला आंध्र प्रदेशच्या कुर्नलमधून २४ जून रोजी अटक केली. रेड्डीकडून मिळालेल्या माहितीच्या आधारे आणखी १३ जणांना बेड्या ठोकण्यात आले. कर्नाटकातील बंगळुरू, हरयाणातील गुरुग्राम, मुंबईतील मालाड, उत्तराखंडातील नैनिताल आणि मणिपूरमधील कांगपोकपी या ठिकाणांहून अटकेच्या कारवाया करण्यात आल्या.