'त्या' महिला पोलिसाला अचानक येऊन लागले फोन कॉल्स, कारण समजल्यानंतर हादरा बसला

बेंगळुरू: सार्वजनिक शौचालयाच्या भिंतीवर महिला पोलिसाच्या नावासहीत मोबाइल क्रमांक लिहिणाऱ्या शिक्षकाविरोधात पोलिसांनी गुन्हा दाखल केला आहे. चिकमंगळूर जिल्ह्यातील कदूर येथील केएसआरटीसीच्या बस थांब्यावरील सार्वजनिक शौचालयाच्या भींतीवर त्याने महिला पोलिसाचे नाव आणि संपर्क क्रमांक लिहिला होता.

येलाहंका न्यू टाउन पोलीस ठाण्यात या प्रकरणी आरोपी सतीश याच्याविरोधात गुन्हा दाखल केला आहे. तो कदूर येथील राहणारा आहे. या प्रकरणी महिला पोलिसाने तक्रार दाखल केली होती.

मिळालेल्या माहितीनुसार, अनेक अज्ञात व्यक्तींचे फोन तिला येऊ लागले. फोन करणाऱ्या व्यक्ती तिच्याकडे शरीरसंबंधांची मागणी करत होते. त्यातील एका व्यक्तीने कदूर बस थांब्यावरील भिंतीवर तुमचा संपर्क क्रमांक मिळाल्याचे तिला सांगितले. हे ऐकून महिला पोलिसाला धक्काच बसला. त्यानंतर महिला पोलीस आणि तिच्या पतीने कदूर बसथांबा गाठला. तेथील सार्वजनिक शौचालयाच्या भिंतीवर तिचा क्रमांक आणि नाव लिहिले होते.

मालकिणीसह कर्मचाऱ्यांना एकाच खोलीत डांबले; त्यानंतर दोघांनी...

हे कृत्य सतीशने केल्याचे तिला समजले. २००६-०७ मध्ये सतीश आणि महिला पोलीस एकाच वर्गात प्रशिक्षण घेत होते. २०१७ मध्ये वर्गमित्राने व्हॉट्सअॅप ग्रुप तयार केला होता आणि त्यात सतीशही होता. सतीश नेहमीच या ग्रुपमध्ये अनावश्यक मेसेज पोस्ट करत होता. तसेच तिला कॉलही करायचा. तिने त्याचे कॉल घेणे टाळले. सतीशने तिचा क्रमांक ग्रुपमधून हटवला. ग्रुपमधील इतरांनी तिला पुन्हा ग्रुपमध्ये अॅड केले. सतीशने पुन्हा तिचा क्रमांक हटवला. काही दिवसांनी दोघांमध्ये बाचाबाची झाली होती. त्रास आणि बदनामी केल्याप्रकरणी तिने पोलिसांत तक्रार दाखल केली. त्याआधारे पोलिसांनी सतीशविरोधात गुन्हा दाखल केला आहे.