गडचिरोली: माओवाद्यांनी वनविभाग कार्यालय पेटवलं; रक्षकांना मारहाण

गडचिरोली: माओवाद्यांनी एटापल्ली तालुक्यातील गट्टा जांबिया येथील वनपरिक्षेत्राधिकारी कार्यालयाची तोडफोड करून जाळपोळ केल्याची घटना मध्यरात्री घडली. तसंच येथील दोन वनसंरक्षकांना बेदम मारहाण करून त्यांच्याकडील मोबाइल घेऊन ते पसार झाले.

काही दिवसांपूर्वी माओवादी नेता सृजनाक्का चकमकीदरम्यान मारली गेल्यानंतर माओवाद्यांनी वाहनांची जाळपोळ केल्याची घटना घडली होती. त्यानंतर काल, मध्यरात्रीच्या सुमारास माओवाद्यांनी पुन्हा जाळपोळ आणि तोडफोड केली आहे. एटापल्ली तालुक्यातील गट्टा जांबिया येथील वनपरिक्षेत्राधिकारी कार्यालयात घुसून तोडफोड केली. त्यानंतर कार्यालय पेटवून दिलं. येथील दोन वनसंरक्षकांना मारहाण केली. तसंच त्यांच्याकडील मोबाइल पळवले. माओवाद्यांनी वनविभागाचं कार्यालय पेटवून दिल्यानं कार्यालयातील काही महत्वाचे दस्तावेज जळून खाक झाले आहेत. तसंच या जाळपोळीत कार्यालयाचं मोठं नुकसान झालं आहे. दरम्यान, काही वर्षांपूर्वी माओवाद्यांनी हेच कार्यालय पेटवून दिलं होतं. त्यानंतर मध्यरात्री पुन्हा या कार्यालयात घुसून जाळपोळ केली आहे. त्यामुळं वनविभागाच्या अधिकारी-कर्मचाऱ्यांमध्ये भीतीचं वातावरण आहे. या ठिकाणी कामे कशी करायची असा प्रश्न त्यांच्यासमोर निर्माण झाला आहे. दरम्यान, ही जाळपोळ गट्टा दलम आणि कंपनी दलमच्या माओवाद्यांनी केल्याचा प्राथमिक अंदाज व्यक्त करण्यात येत आहे.

धक्कादायक! कार्टून पाहू दिलं नाही, १३ वर्षीय मुलाची आत्महत्या

दुचाकी हटवण्यावरून तरुणाला मारहाण; पोलीस अधिकाऱ्यावरच गुन्हा