Nagpur crime: मोपेड केली चोरी, एटीएममधून काढले पैसे

नागपूर: राजनगर कोव्हिड केअर सेंटरसमोर उभी मोपेड चोरी करण्यात आली. मोपेडच्या डिक्कीत असलेल्या एटीएम कार्डच्या आधारे ८७ हजार रुपयांची रोख काढून फसवणूकही करण्यात आली. १७ एप्रिलला ही घटना घडली. उज्वला पंडितराव धामनकर (वय ३६ रा. एकतानगर, गोरेवाडा) यांनी दिलेल्या तक्रारीवरून मानकापूर पोलिसांनी चोरी करून फसवणूक केल्याचा गुन्हा दाखल केला आहे.

पोलिसांनी दिलेल्या माहितीनुसार, उज्वला या व्हीएलसीसीमध्ये काम करायच्या. १७ एप्रिलला सकाळी त्या मोपेडने तपासणीसाठी राजनगर कोव्हिड सेंटर येथे गेल्या. यादरम्यान संधी साधून चोरट्याने मोपेड चोरी केली. मोपेडच्या डिक्कीत असलेल्या पर्समध्ये एचडीएफसीचे एटीएम कार्ड , पासबुक व रोख होती. पर्समध्येच एका चिठ्ठीवर एटीएम कार्डचा पीन क्रमांकही होता. चोरट्याने एकाच दिवशी एटीएममधून ८७ हजार रुपयांची रोख काढली. उज्वला यांनी मानकापूर पोलिसांत तक्रार दिली. एकाच दिवशी ८७ हजारांची रोख एटीएममधून निघाल्याने पोलिसांनाही आश्चर्याचा धक्का बसला आहे. पोलिसांनी गुन्हा दाखल करून तपास सुरू केला आहे.

पुणे: रुग्णाच्या मृत्यूनंतर नातेवाइकांची डॉक्टरांना मारहाण, हॉस्पिटलमध्ये तोडफोड

खेळता -खेळता झाला बेपत्ता

नागपूर : घरासमोर खेळता खेळता दहा वर्षीय मुलगा बेपत्ता झाला. ही घटना सोमवारी सकाळी ९ वाजताच्या सुमारास डोबीनगरमधील पहेलवान बाबा चौक येथे उघडकीस आली. शेख रहीम अबू ,असे बेपत्ता मुलाचे नाव आहे. याप्रकरणी तहसील पोलिसांनी अपहरणाचा गुन्हा दाखल केला आहे. अन्य एका घटनेत मानकापूरमध्ये राहणारी १५ वर्षीय मुलगी सोमवारी रात्री बेपत्ता झाली. याप्रकरणीही मानकापूर पोलिसांनी अपहरणाचा गुन्हा दाखल केला आहे.

नांदेड: उपजिल्हा रुग्णालयात कोविड वॉर्डात डॉक्टरवर चाकूहल्ला

मनोरुग्णालयातील दोघांचा मृत्यू

नागपूर : प्रादेशिक मनोरुग्णालयात उपचार घेत असलेल्या दोघांचा मृत्यू झाला. साजन हेला कोरकू (वय ५१ ) यांची सोमवारी सकाळी प्रकृती खालावली. उपचारादरम्यान त्यांचा मृत्यू झाला. याचप्रमाणे सोमवारी सायंकाळी मोला रघुनाथ गायधने (वय ८६) यांचीही प्रकृती खालावल्याने मृत्यू झाला. दोन्ही प्रकरणी मानकापूर पोलिसांनी आकस्मिक मृत्यूची नोंद केली आहे.