नाशिक हादरलं; १३ वर्षीय मुलीवर सामूहिक बलात्कार

म. टा. वृत्तसेवा नाशिकरोड: नाशिकरोड पोलीस ठाण्याच्या हद्दीतील एकलहरे रोडवरील अरिंगळे मळा येथे १३ वर्षीय अल्पवयीन मुलीवर सामूहिक बलात्काराची घटना घडली आहे. पीडित मुलीच्या आईने दिलेल्या फिर्यादीवरून नाशिकरोड पोलिसांनी सात संशयितांना ताब्यात घेतले आहे.

या सात संशयितांमध्ये एका अल्पवयीन मुलासह एका महिलेचा देखील समावेश आहे. दीपक खरात (वय १९, रा. सिन्नर फाटा), रवी कुऱ्हाडे (वय १९, रा. पांडवलेणी जवळ), आकाश गायकवाड (वय २४, रा. रेल्वे ट्रॅक्शन, नाशिकरोड), सुनील कोळे (वय २४, रा. आम्रपाली झोपडपट्टी, कॅनॉलरोड), सोमनाथ खरात (वय १९, रा. गुलाबवाडी, मालधक्कारोड) आणि पूजा वाघ (वय २७) अशी अटक केलेल्या संशयितांची नावे आहेत.

या सर्व संशयितांना नाशिक न्यायालयात रविवारी सकाळी हजर केले असता, त्यांना १६ जानेवारीपर्यंत पोलीस कोठडी सुनावली असल्याची माहिती नाशिकरोड पोलीस ठाण्याचे वरिष्ठ पोलीस निरीक्षक सूरज बिजली यांनी दिली. पीडितेच्या आईने दिलेल्या माहितीनुसार, पीडित मुलीवर संशयितांकडून दुसऱ्यांदा बलात्कार केला आहे.