औरंगाबादेत नशेच्या गोळ्या विकणाऱ्यास अटक

औरंगाबाद : नशेच्या गोळ्या व औषधीची विक्री करणाऱ्या आरोपीला बुधवारपर्यंत पोलिस कोठडीत ठेवण्याचे आदेश प्रथम वर्ग न्यायदंडाधिकारी एस. एस. दहातोंडे यांनी दिले. सिटीचौक पोलिसांनी रविवारी पहाटे पाठलाग करून या आरोपीला अटक केली होती. शेख अतिक शेख अब्दुल्ला (४४, रा. खत्री हॉस्पिटल जवळ, चेलीपुरा) असे आरोपीचे नाव आहे. तो सराईत गुन्हेगार आहे.

या प्रकरणात सिटीचौक पोलिस ठाण्याचे उपनिरीक्षक काशीनाथ महांडुळे (४०) यांनी फिर्याद दिली. त्यानुसार, १५ मे रोजी रात्री महांडुळे व त्यांचे पथक गस्त घालत होते. चेलीपुरा चौकात शेख अतिक दिसला, त्याच्या हातात एक प्लास्टिकची पिशवी दिसली. पोलिसांनी पाठलाग करून त्याला पकडले. त्यावेळी त्याच्या बॅगेमध्ये १३ हजार ३१९ रुपये किंमतीच्या नशा आणणाऱ्या गोळ्या आणि औषधी सापडली. या प्रकरणात सिटीचौक पोलिस ठाण्‍यात गुन्हा दाखल करण्यात आला. आरोपीने गोळ्या कोणाकडून आणल्या आणि कोणाला विक्री करणार होता, त्याचे साथीदार शोधायचे आहेत, असे सांगत सहायक सरकारी वकील निता किर्तीकर यांनी आरोपीला कोठडी देण्याची विनंती न्यायालयाकडे केली.