‘गे डेटींग’ अॅपवर ओळख झाली, भेटायला बोलावलं अन्

म. टा. प्रतिनिधी, पुणे: 'गे डेटिंग अॅप'च्या माध्यमातून ओळख झालेल्या व्यक्तीला कोंढव्यातील शिवनेरीनगर येथे भेटायला बोलवून शस्त्राच्या धाकाने लुटल्याचा धक्कादायक प्रकार समोर आला आहे. आरोपींनी 'गुगल पे'च्या माध्यमातून पैसे घेतले आहेत. या प्रकरणी कोंढवा पोलिस ठाण्यात तिघांच्या विरोधात जबरी चोरीचा गुन्हा दाखल करण्यात आला आहे.

याबाबत वानवडी परिसरात राहणार्‍या एका ३५ वर्षीय व्यक्तीने तक्रार दिली आहे. त्यानुसार पोलिसांनी एका विधीसंघर्षित मुलासह तिघांना ताब्यात घेतले आहे. याबाबत कोंढवा पोलिस ठाण्याचे वरिष्ठ निरीक्षक विनायक गायकवाड यांनी सांगितले की, तक्रारदार व्यक्ती मूळची बीड जिल्ह्यातील आहे. त्यांचा ट्रान्सपोर्टचा व्यवसाय आहे. तक्रारदार याने 'ब्लूड गे अॅप'वर लॉग इन केले होते. या वेळी त्याची कृष्णा नावाच्या व्यक्तीशी ओळख झाली. त्यांच्यामध्ये काही वेळ चॅटिंग झाले. त्यानंतर कृष्णाने तक्रारदार याला कोंढवा खुर्द येथील शिवनेरीनगर येथे सकाळी दहाच्या सुमारास भेटायला बोलावले. त्या ठिकाणी एका इमारतीच्या तिसऱ्या मजल्यावर तक्रारदार यांना नेण्यात आले. तेथे त्याला कपडे काढायला लावले. यानंतर कृष्णाने त्यांचे व्हिडिओ व फोटो काढायला सुरुवात केली. यामुळे घाबरलेल्या तक्रारदाराने तिथून निघून जाण्याचा प्रयत्न केला. त्याचा राग येऊन कृष्णाने फोन करून त्याच्या दोन साथीदारांना बोलावून घेतले. यातील एकाने हत्याराचा धाक दाखविला; तर इतर दोघांनी हाताने मारहाण केली. यानंतर तक्रारदार यांना त्यांच्या 'गुगल पे'द्वारे दहा हजार रुपये आरोपींना देण्यास भाग पाडले. यानंतर घाबरलेल्या तक्रारदार यांनी कोंढवा पोलिस ठाण्यात धाव घेऊन तक्रार दिली. याप्रकरणी तपास करून तिघांना ताब्यात घेण्यात आले आहे.

सिंहगड रोड परिसरात काही दिवसांपूर्वी अशा प्रकारची घटना घडली होती. गे अॅपवरून तरुणाला भेटायला बोलविले होते. त्यानंतर तलावरीचा धाक दाखवूत लुटण्यात आले होते. या गुन्ह्यातील आरोपीला गुन्हे शाखेने अटक केली होती. डेटिंग व 'गे अॅप'द्वारे झालेल्या ओळखीतून जबरी चोरीच्या घटना घडत असतात. या प्रकारचे अॅप विश्वसनीय नसतात. फसवणूक झाल्यानंतर अनेकजण बदनामीच्या भितीने तक्रार दाखल करत नाही. यामुळे अशा गुन्हेगारांचे फावत आहे. अॅपवर ओळख झालेल्या व्यक्तीवर विश्वास ठेऊ नये, असे आवाहन पोलिसांनी केले आहे.

'ते' दोघे मासे पकडण्यासाठी नदीवर गेले होते, सकाळ उजाडली पण... १७ वर्षीय मुलीवर कॉलेज कॅम्पसमध्ये बलात्कार; पोलीस हाकेच्या अंतरावर होते... पती-पत्नीचे भांडण सोडवण्यासाठी शेजारचे दाम्पत्य गेले, अन्...रात्रभर सिलिंडरमधून गॅस गळती झाली, सकाळी शेगडी पेटवताच...