पुणे : लग्नाच्या आमिषाने तरुणीवर बलात्कार; आरोपीला अटक

पिंपरी : लग्नाचे आमिष दाखवून एका तरुणाने तरुणीवर वारंवार तिच्या मर्जीविरोधात जाऊन शारीरिक संबंध प्रस्थापित केले. त्यानंतर लग्नास नकार दिला. यामुळे तरुणीने विषारी औषध पिऊन आत्महत्येचा प्रयत्न केला. त्यानंतर तरुणाने त्या दोघांमधील फोटो, मेसेज, रेकॉर्डिंग डिलिट केले. तरुणीने लिहिलेली डायरी लपवली.

याबाबत तरुणाविरोधात गुन्हा दाखल करण्यात आला असून, पोलिसांनी तरुणाला बेड्या ठोकल्या आहेत. अविनाश भांगे (वय २७, रा. नखाते वस्ती, काळेवाडी, पिंपरी) असे अटक केलेल्या तरुणाचे नाव आहे. याबाबत पीडितेने गुरुवारी (१४ जुलै) भोसरी पोलिस ठाण्यात फिर्याद दिली आहे. हा प्रकार जून २०१९ ते १३ जुलै २०२१ या कालावधीत मळवली स्टेशन, लोणावळा येथे एका लॉजवर, पीडित तरुणीच्या घरी आणि हिंजवडीतील हॉटेल ट्वीन्स टॉवर लॉजिंग येथे घडला. पोलिसांनी दिलेल्या माहितीनुसार, अविनाशने पीडितेला लग्नाचे आमिष दाखवले. त्यानंतर तरुणीच्या इच्छेविरुद्ध शारीरिक संबंध प्रस्थापित केले. तरुणीला शिवीगाळ, दमदाटी करून मारहाण केली.