पुणे : काळ्या बाजारात धान्य नेणाऱ्याला अटक

म. टा. वृत्तसेवा, सासवड

दिवे येथील सरकारी धान्य गोदामातून सासवड येथील दुकानांत नेण्यासाठी घेतलेला माल सासवडऐवजी जेजुरीकडे नेणाऱ्या ट्रकचालकाला पोलिसांनी अटक केली आहे.

ट्रकचालक बाळू भीवा मदने (रा. जगताप आळी, सासवड) असे अटक केलेल्याचे नाव आहे. त्याच्यावर जीवनावश्यक वस्तू कायदा १९५५ अन्वये गुन्हा दाखल करण्यात आल्याचे हवालदार विनोद माने यांनी सांगितले. या प्रकरणी महसूल विभागातील कर्मचारी सुधीर बडधे यांनी जेजुरी पोलिस ठाण्यात फिर्याद दिली आहे.

पोलिसांनी दिलेल्या माहितीनुसार, आरोपी मदने याने सासवड येथील व्यापारी ए. बी. माने आणि रिझवान बागवान यांच्या दुकानांसाठीचे धान्य २१ मे रोजी दिवे येथील गोदामातून घेतले होते. हे धान्य सासवडकडे नेण्याऐवजी काळ्या बाजारात विक्रीसाठी जेजुरीकडे नेण्यात येत होते. याची माहिती मिळताच जेजुरी पोलिसांनी साकुर्डे फाटा येथे आरोपीला पकडले. टेम्पोतून २०० पोती गहू आणि तांदूळ असा तीन लाख ९९ हजार ५०० रुपयांचा माल हस्तगत करण्यात आला आहे. पुढील तपास सासवड पोलिस ठाण्याचे निरीक्षक अण्णासाहेब घोलप करत आहेत.