नवीन लग्न झालं होतं, 'तो' बायकोची हौस पुरवण्यासाठी चोरायचा साड्या, ड्रेस

म. टा. प्रतिनिधी, पुणे: नवीन लग्न झाल्यामुळे पत्नीला खूश करण्यासाठी रस्त्याच्या बाजूला उभ्या असलेल्या वाहनांतून साड्यांची आणि ड्रेसची चोरी करणाऱ्या आरोपीला गुन्हे शाखेच्या पोलिसांनी अटक केली आहे. त्याच्याकडून वाहनचोरी आणि घरफोडीचे नऊ गुन्हे उघडकीला आणून १३ लाख ४० हजार रुपयांचा ऐवज जप्त करण्यात आला आहे.

रोहन बिरू सोनटक्के (वय २१, रा. वारजे माळवाडी) असे अटक केलेल्या चोरट्याचे नाव आहे. त्याच्याकडून १८ मोबाइल, तीन लॅपटॉप, साड्या, किराणा माल, दुचाकी आणि दोन चारचाकी गाड्या असा मुद्देमाल जप्त करण्यात आला आहे. गुन्हे शाखेच्या युनिट पाचचे सहायक पोलिस निरीक्षक प्रसाद लोणारे पथकासह हडपसर परिसरात गस्त घालत असताना सराईत गुन्हेगार रोहन सोनटक्के ॲमनोरा मॉलच्या मागे मोबाइल विक्रीसाठी येणार असल्याची माहिती मिळाली.

तरुणीचं घरातून केलं अपहरण; चौघांनी केला सामूहिक बलात्कार

त्यानुसार अप्पर पोलिस आयुक्त अशोक मोराळे, वरिष्ठ पोलिस निरीक्षक हेमंत पाटील यांच्या मार्गदर्शनाखाली पथकाने तेथे जाऊन सोनटक्केला ताब्यात घेतले. त्याच्याकडे केलेल्या चौकशीत नऊ गुन्हे केल्याची कबुली दिली. हडपसर, वानवडी, कोंढवा, मार्केट यार्ड, विश्रांतवाडी, पिंपरी आयुक्तालयातील चिखली आणि उस्मानाबाद जिल्ह्यातील मुरूम पोलिस ठाण्यात घरफोडी आणि वाहनचोरीचे नऊ गुन्हे उघडकीस आणण्यात यश आले आहे.