Pune crime: डुक्करखिंड परिसरात मृतदेह आढळला, खून झाल्याचे स्पष्ट

म. टा. प्रतिनिधी, पुणे: डुक्करखिंड येथील भुयारी मार्गाजवळ एका सराईताचा मृतदेह बुधवारी सकाळी आढळला. या सराईतावर धारदार शस्त्राने वार करून खून केल्याचे समोर आले आहे. या प्रकरणी कोथरूड पोलिस ठाण्यात खुनाचा गुन्हा दाखल करण्यात आला.

जगदीश जितेंद्र पारधे (वय २८, रा. म्हाडा कॉलनी, वारजे) असे खून झालेल्या व्यक्तीचे नाव आहे. या प्रकरणी सहायक पोलिस निरीक्षक राहुल यादव यांनी तक्रार दिली. महामार्गालत डुक्करखिंड येथील पुलाजवळील शिंदे वस्ती येथे बुधवारी सकाळी नऊच्या सुमारास रस्त्याने जाणाऱ्या व्यक्तीला हा मृतदेह दिसला. त्या व्यक्तीने तत्काळ त्याची माहिती माहिती पोलिसांनी दिली. त्यानंतर कोथरूड पोलिसांनी घटनास्थळी धाव घेऊन तपास सुरू केला. तपासादरम्यान तो मृतदेह जगदीश पारधे याचा असल्याचे समजले. पारधे याच्या चेहऱ्यावर जखमाचे व्रण आढळले आहेत.

मुंबईसह परिसरात एनसीबीचे छापे; ड्रग्ज फॅक्टरी उद्ध्वस्त

पोलिसांनी मृतदेह ताब्यात घेऊन शवविच्छेदनासाठी ससून रुग्णालयात पाठविला. पारधे सराईत गुन्हेगार असून, त्याच्यावर वारजे पोलिस ठाण्यात गुन्हे दाखल आहेत. पारधे स्थानिक वस्तीतील नागरिकांना त्रास देत असे. मद्यप्राशन करून नागरिकांना त्रास देऊन त्यांना मारहाण करीत होता. यातूनच पारधे याचा खून झाल्याची शक्यता पोलिसांनी वर्तवली. वारजे पोलिस ठाण्यात दाखल असलेल्या खुनाच्या प्रयत्नाच्या गुन्ह्यात तो कारागृहात होता. लॉकडाउनमध्ये तो जामिनावर बाहेर आला होता. या प्रकरणी कोथरूड पोलिस अधिक तपास करीत आहेत.