पिंपरी: राष्ट्रवादीच्या नगरसेवकाची दुचाकी दिवसाढवळ्या पळवली

म. टा. प्रतिनिधी, पिंपरी: राष्ट्रवादी काँग्रेसच्या नगरसेवकाची दुचाकी त्यांच्या जनसंपर्क कार्यालयासमोरून चोरून नेल्याचा प्रकार दापोडी येथे उघडकीस आला आहे. ४ सप्टेंबरला सकाळी नऊ वाजता नगरसेवक राजू बनसोडे यांच्या दापोडी येथील जनसंपर्क कार्यालयासमोरून दुचाकी चोरीला गेल्याचे उघड झाले. या प्रकरणी गुन्हा दाखल करण्यात आला आहे. वाहनचोरांनी शहरात धुमाकूळ घातला असून, रोज तीन ते चार वाहने चोरीला जात आहेत. वाहनचोरांच्या मुसक्या आवळण्याचे आव्हान पोलिसांसमोर उभे ठाकले आहे.

नगरसेवक राजू विश्वनाथ बनसोडे (वय ४०, रा. सीएमई गेट समोर, जाधव चाळ, दापोडी) यांनी या प्रकरणी भोसरी पोलीस ठाण्यात तक्रार दाखल केली आहे. पोलिसांनी अज्ञात चोरट्याच्या विरोधात गुन्हा दाखल केला आहे. पोलिसांनी दिलेल्या माहितीनुसार, नगरसेवक बनसोडे यांनी त्यांची १५ हजार रुपये किमतीची मोपेड दुचाकी पुणे-मुंबई महामार्गावर सीएमई गेटसमोर असलेल्या जनसंपर्क कार्यालयासमोर ३ सप्टेंबर रोजी दुपारी साडेतीन वाजता पार्क केली होती. अज्ञात चोरट्यांनी दुचाकीचे लॉक तोडून ती पळवली. हा प्रकार ४ सप्टेंबरला सकाळी नऊ वाजता उघडकीस आला. याबाबत ९ सप्टेंबरला गुन्हा दाखल करण्यात आला आहे. बनसोडे यांच्या कार्यालयासमोर लष्करी अभियांत्रिकी महाविद्यालय आहे. तेथे मोठी सुरक्षा असते. तसेच हा रस्ता वर्दळीचा असूनही चोरी झाल्याने आश्चर्य व्यक्त केले जात आहे. शहरातून दररोज होणाऱ्या वाहनचोरीच्या घटनांवर अंकुश ठेवण्यात पोलिसांना यश येताना दिसत नाही. त्यातच आता पोलिस आयुक्त म्हणून कृष्णप्रकाश यांनी पदभार घेतला असून, त्यांना तरी या चोऱ्या रोखता येतात का, हे पाहावे लागणार आहे.

संतापजनक! जन्मदात्या बापाकडूनच मुलीवर बलात्कार; ६ वर्षे शोषण

बोगस कोविड टेस्ट रिपोर्ट दिले जात होते, 'असा' झाला भंडाफोड

माहेरी आलेल्या नवविवाहित महिलेवर सामूहिक बलात्कार

भाजप नेता तरुणीचा करत होता पाठलाग; चपलेनं मारलं, व्हिडिओ व्हायरल

पत्नीची हत्या करून 'तो' पोहोचला थेट पोलीस ठाण्यात