घर बसल्या पुण्यातील महिलेचे ३० हजार 'असे' लुटले

म. टा. प्रतिनिधी, पुणेः कर्ज वाढवून देण्याच्या बहाण्याने एका ५१ वर्षीय महिलेची ऑनलाइन ३० हजार रुपयांची फसवणूक करण्यात आली. ताडीवाला रस्ता परिसरात हा प्रकार घडला. याबाबत बंडगार्डन पोलिस स्टेशनमध्ये तक्रार दाखल करण्यात आली आहे.

विनिता रॉबर्ट डिसुझा (वय ५१) यांनी याप्रकरणी तक्रार दिली आहे. डिसुझा या घरी असताना त्यांना अनोळखी मोबाईल क्रमांकावरून कॉल आला. बजाज फायनान्समधून बोलत असल्याचे या व्यक्तीने सांगितले. तुमचे कर्ज वाढवून देतो, असे सांगत या व्यक्तीने डिसुझा यांचा विश्वास संपादन केला. त्यानंतर तक्रारदार यांना एक लिंक पाठवून त्यांच्या खात्याची माहिती करून घेत त्यांच्या खात्यातून तीनवेळा दहा हजार रुपये काढून घेत त्यांची फसवणूक केली. पैसे काढले गेल्याचे लक्षात आल्यानंतर डिसुझा यांनी पोलिसांकडे धाव घेत तक्रार दखल केली आहे, अशी माहिती पोलिसांनी दिली. या प्रकरणाचा पुढील तपास पोलिस निरीक्षक शिंदे करत आहेत.