धक्कादायक! येरवडा जेलमधून सुटलेल्या कैद्याच्या स्वागताला गर्दी

म. टा. प्रतिनिधी, पुणे: हत्येचा गुन्ह्यातील आरोपीला येरवडा तुरुंगातून जामीन मिळाल्यानंतर त्याच्या स्वागतासाठी तुरुंगाबाहेर लॉकडाऊन लागू असतानाही मोठी गर्दी झाल्याचा धक्कादायक प्रकार उघडकीस आला आहे. त्यामुळं लॉकडाऊनच्या नियमांचे उल्लंघन केल्याप्रकरणी येरवडा पोलीस ठाण्यात ११ जणांविरोधात गुन्हा दाखल करण्यात आला आहे. आरोपीविरोधात लोणी काळभोर पोलीस ठाण्यात गुन्हा दाखल आहे.

लाला सिद्धू ठुसे (वय ३९, रा. अष्टापूर, हवेली), गणेश दत्तात्रय चोंधे (वय ३८, रा. महंमदवाडी), गणेश पांडुरंग काळे (वय ३०,रा. वडगाव शेरी), सोपान नवनाथ मडके (वय २८, काळेपडळ), शिरीष अनिल कारले (वय २६, रा. खेरपाल, नगर), दादा बबन गव्हाणे (वय २८, रा. श्रीगोंदा नगर), योगेश लक्ष्मण गव्हाणे (वय २८, रा. श्रीगोंदा), नितीन भिकोबा सोडनवर (वय ३८, बोरीपार्धी, दौंड), संतोष हरिभाऊ गव्हाणे (वय २८, रा. गव्हाणेवाडी, श्रीगोंदा), अंकुश विठ्ठल मल्लाव (वय ४०, रा. येरवडा), संदीप बापू जगदाळे (रा. करडे, शिरूर) अशी गुन्हा दाखल करण्यात आलेल्यांची नावे आहेत. या प्रकरणी पोलीस नाईक सचिन रणदिवे यांनी येरवडा पोलीस ठाण्यात तक्रार दिली आहे.

पोलिसांनी दिलेल्या माहितीनुसार, लोणी काळभोर परिसरात २०१५ मध्ये झालेल्या खून प्रकरणात विष्णू यशवंत जाधव आरोपी आहे. तो सध्या येरवडा तुरुंगात होता. दोन दिवसांपूर्वी त्याची येरवडा मध्यवर्ती तुरुंगातून जामिनावर सुटका होणार होती. त्या पार्श्वभूमीवर जाधवला घेऊन जाण्यासाठी संचारबंदीमध्ये देखील येरवडा तुरुंगासमोरील रस्त्यावर ११ जण जमले होते. संचारबंदीत सुरक्षित अंतर न पाळता त्यांनी व्यक्तिगत सुरक्षा धोक्यात आणली होती. शिवाय करोनाचा संसर्ग पसरवण्याचे कृत्य केल्याप्रकरणी त्यांच्याविरोधात येरवडा पोलीस ठाण्यात गुन्हा दाखल करण्यात आला. या सर्व आरोपींना नोटिसा बजावण्यात आल्या आहेत. या प्रकरणी सहायक पोलीस निरीक्षक बलभीम ननवरे अधिक तपास करीत आहेत.

पुणे: २ मुलांसह महिलेनं विहिरीत मारली उडी; ७ वर्षांच्या मुलाचा मृत्यू

व्हॉट्सअॅप, टिकटॉक, इन्स्टाग्रामवरून अफवा; ३५२ गुन्हे दाखल