२ दिवस कार नाल्याजवळ उभी होती, दरवाजा उघडताच पोलीसही हादरले

कानपूर : उत्तर प्रदेशातील कानपूरमध्ये एका तरुणाचा मृतदेह त्याच्या कारमध्ये आढळून आला. दोन दिवस ही कार सीटीआय नाल्याजवळ रस्त्यालगत उभी होती. स्थानिकांनी याबाबत माहिती दिल्यानंतर पोलिसांनी घटनास्थळी धाव घेऊन कारचा दरवाजा उघडला. त्यावेळी पाठिमागच्या सीटवर तरुणाचा मृतदेह आढळून आला.

डीआयजी प्रीतिंदर सिंह आणि फॉरेन्सिक टीमने घटनास्थळाची पाहणी केली. तरुणाची गळा आवळून हत्या करण्यात आल्याचे स्पष्ट झाले आहे. पोलिसांनी तरुणाचा मृतदेह ताब्यात घेऊन विच्छेदनासाठी रुग्णालयात पाठवण्यात आला आहे. रेलबाजार पोलीस ठाण्याच्या हद्दीतील शांतीनगर क्रॉसिंगजवळ राहणाऱ्या आशू यादववर शहरातील अनेक पोलीस ठाण्यात गुन्हे दाखल होते. आशूचे लग्न सात वर्षांपूर्वी गोरखपूरच्या ज्योतीसोबत झाले होते. तो पत्नी ज्योती, दोन मुले शुभ आणि रिया, तसेच आई मालतीसोबत राहत होता. १ जानेवारीला त्याचा वाढदिवस होता. त्याने आपल्या नातेवाईकांना आणि मित्रांना वाढदिवसाच्या पार्टीसाठी निमंत्रित केले होते.

आशूची बहीण शानूने पोलिसांना सांगितले की, ३१ डिसेंबरला मध्यरात्री अडीच वाजता तो कुणालाही न सांगता घरातून निघून गेला. १ जानेवारीला त्याचा वाढदिवस होता. आशू दुपारपर्यंत घरी परतला नाही. त्याचा फोनही बंद येत होता. त्याची वाट बघितली. संध्याकाळ झाली तरी तो आला नाही. अखेर रेलबाजार पोलीस ठाण्यात तो बेपत्ता झाल्याची तक्रार नोंदवली. शनिवारी त्याचा मृतदेह बर्रा पोलीस ठाण्याच्या हद्दीत धर्मेंद्र नगरमधील सीटीआय नाल्याजवळ कारमध्ये आढळून आला.

भयंकर! झोपलेल्या पतीच्या अंगावर पत्नीनं ओतलं उकळतं तेल

नगरसेविकेच्या पतीसोबत झाला होता वाद

शानूने सांगितले की, खपरा मोहाल येथे राहणाऱ्या नगरसेविकेचा पती राजू सोनकर याच्यासोबत त्याला वाद झाला होता. त्याने आशूला मारहाण केली होती. राजू सोनकरची मुले अती आणि सोंटू याने आशूला धमकावले होते. दरम्यान, डीआयजी प्रीतींदर सिंह यांनी सांगितले की, एक कार बेवारसरित्या आढळून आली आहे. कारवर स्टिकर लावलेला होता. त्यावर मृताचे नाव आणि त्याचा मोबाइल नंबर होता. कारमध्ये आशूचा मृतदेह आढळून आला आहे. लवकरच या घटनेचा छडा लावला जाईल.