मित्रांसोबत सेक्ससाठी 'तो' गर्लफ्रेंडला द्यायचा धमकी, अखेर...

अलीगढ: उत्तर प्रदेशातील अलीगढमधील हरदुआगंज पोलीस ठाण्याच्या हद्दीतील एका गावातून बेपत्ता झालेल्या अल्पवयीन मुलीचा मृतदेह रेल्वे रुळांवर आढळला. मुलीचे अपहरण करून तिची हत्या केल्याचा आरोप तिच्या कुटुंबीयांनी केला आहे. तीन तरूण तिला शारीरिक संबंध ठेवण्यासाठी ब्लॅकमेल करत होते. शारीरिक संबंध न ठेवल्यास अश्लील फोटो व्हायरल करण्याची धमकीही त्यांनी दिल्याचा आरोप आहे.

मुलीने आत्महत्या करण्यापूर्वी एक चिठ्ठी लिहून ठेवली होती. ती मुलीच्या कुटुंबीयांनी पोलिसांकडे दिली आहे. पोलिसांनी तिन्ही आरोपींविरोधात पॉक्सो अॅक्ट अंतर्गत गुन्हा दाखल केला आहे. मुलीच्या वडिलांनी पोलिसांत दाखल केलेल्या तक्रारीनुसार, भटौला गावातील संकेत नावाच्या तरुणाने लग्नाच्या भूलथापा देऊन मुलीसोबत शारीरिक संबंध ठेवले होते. त्याचे मित्र राहुल आणि हिमांशू हे देखील मुलीला धमकावायचे. तिच्यासोबत शारीरिक संबंध ठेवण्यासाठी तिला ब्लॅकमेल करत होते. त्यामुळे मुलगी गेल्या काही दिवसांपासून त्रस्त होती. याचे कारणही अनेकदा विचारले. मात्र, तिने काहीच सांगितले नाही.

'कास्टिंग काऊच' रॅकेटचा पर्दाफाश

मिळालेल्या माहितीनुसार, रविवारी संकेत आणि त्याच्या दोन्ही मित्रांनी वेगवेगळ्या मोबाइल क्रमांकांवरून मुलीला तीन ते चार वेळा फोन केले. त्यामुळे त्रस्त झालेली मुलगी दुपारी एक वाजताच्या सुमारास अलीगढला जाण्याचा बहाणा करून घरातून बाहेर पडली. गावाबाहेर आधीपासून तिघे आरोपी दुचाकी घेऊन उभे होते. ते मुलीला दुचाकीवर बसवून घेऊन गेले होते. याबाबत गावातीलच राघवेंद्र पाल याने तिच्या घरच्यांना सांगितले होते. त्याचदरम्यान, रेल्वे रुळांवर मुलीचा मृतदेह सापडला. तिचे अपहरण करून हत्या केल्याचा आरोप कुटुंबीयांनी केला आहे.