नालासोपाऱ्यात अल्पवयीन मुलीची आत्महत्या

म. टा. वृत्तसेवा, वसई :

एका अल्पवयीन मुलीने आत्महत्या केल्याची घटना नालासोपाऱ्यात घडली आहे. घर सोडून गेल्याच्या चौथ्या दिवशी तिचा मृतदेह मिळाला असून या मृतदेहाचे लचके श्वानांमार्फत तोडण्यात आल्याने आत्महत्या कशी झाली, याबाबत अजूनही खुलासा झालेला नाही. मात्र याबाबत तुळींज पोलिसांनी अकस्मात मृत्यूची नोंद केली.

नालासोपारा संतोष भुवन येथे एक १७ वर्षीय मुलगी आपल्या आई-वडिलांसह राहत होती. ती अचानक घर सोडून गेल्याची तक्रार तिच्या कुटुंबीयांनी तुळींज पोलिस ठाण्यात नोंदविली. या मुलीचा तपास घेत असता तुळींज पोलिसांना या मुलीचा मृतदेह संतोष भुवन परिसरात चार दिवसांनंतर रविवारी पहाटे आढळला. अधिक तपास केला असता, घर सोडून जाताना या मुलीने आत्महत्या करणार असल्याची चिठ्ठी ठेवली होती. मात्र कुटुंबीयांनी ती लपविली होती. अचानक तिचा मृतदेह सापडल्याने पोलिसांच्या मनात संशय निर्माण झाल्यानंतर ही बाब उघडकीस आली. मात्र या मुलीची आत्महत्या नेमकी कशा प्रकारे झाली, याबाबत खुलासा न झाल्याचे पोलिसांनी सांगितले. सध्या अकस्मात मृत्यूची नोंद करण्यात आली असून मृतदेह शवविच्छेदनासाठी पाठविण्यात आला आहे. याबाबत अधिक तपास सुरू असल्याचे तुळींज पोलिस ठाण्याचे वरिष्ठ पोलिस निरीक्षक राजेंद्र कांबळे यांनी सांगितले.