पतीच्या मारहाणीला कंटाळून महिलेची आत्महत्या; आरोपीला अटक

औरंगाबाद : पतीसह सासू सासऱ्याच्या मारहाणीला कंटाळून विवाहितेने आत्महत्या केल्याची घटना मंगळवारी (११ मे) रात्री मुकुंदवाडी परिसरातील जयभवानी नगरात घडली. या प्रकरणात मुकुंदवाडी पोलिसांनी आत्महत्येस प्रवृत्त केल्याप्रकरणी महिलेच्या पतीला पहाटे अटक केली. कृष्णा बाबासाहेब पारखे (२८, रा. जयभवानी नगर) असे आरोपीचे नाव असून त्याला शनिवारीपर्यंत (१५ मे) पोलिस कोठडीत ठेवण्‍याचे आदेश प्र‍थम वर्ग न्यायदंडाधिकारी ए.एस. कांबळे यांनी दिले.

प्रकरणात मयत कल्पनाचे वडील जालींदर संपतराव तेरे (५५, रा. पाचोड, ता. पैठण) यांनी फिर्याद दिली. कृष्णा दारू पिऊन कल्पनाला मारहाण करत होता, असे त्यांनी फिर्यादीमध्ये म्हटले आहे. आरोपीला आज न्यायालयात हजर करण्यात आले असता, या प्रकरणाचा तपास बाकी आहे, अन्य कोणाचा गुन्ह्यात तपास आहे का, हे तपासायचे आहे, असे सांगत आरोपीला पोलिस कोठडी देण्याची विनंती सहायक सरकारी वकील योगेश तुपे यांनी न्यायालयाकडे केली.