संगीतसमाधीचा अनुभव देणारा बासरीवादक

रसिकांना बासरीच्या माध्यमातून एका वेगळ्या जगात पोहोचवणारे बासरीवादक, टीव्हीच्या पडद्याच्या माध्यमातून ज्यांच्या बासरीवादनातील जादू प्रेक्षकांनी अनुभवली असे बासरीवादक, बासरीवादन म्हणजे शास्त्रीय संगीतच असणार, त्यात काय मजा येणार, हा सामान्य प्रेक्षकांचा समज खोडून काढणारे बासरीवादक अमर ओक. ओक पहिल्यादांच मुंबईमध्ये अमर बन्सी हा त्यांचा कार्यक्रम गुढीपाडव्याच्या पहाटे सादर करणार आहेत. ‘महाराष्ट्र टाइम्स’ या कार्यक्रमाचा मीडिया पार्टनर आहे. या निमित्ताने त्यांच्याशी मारलेल्या गप्पा…

‘अमर बन्सी’ कार्यक्रमाची निर्मिती कशी झाली?

आयडिया सारेगमप सुरू झाले आणि गायक मंडळींसोबतच वादक मंडळीही घराघरात पोहोचली. या गाण्यांच्या मध्ये आम्ही एकादा संगीताचा तुकडा सादर करायचो. तेव्हा लोकांना ते आवडायचे. मात्र, या कार्यक्रमात लहानसा तुकडा सादर झाल्याने त्यांना हा सांगीतिक अनुभव अजून अधिक प्रमाणात हवा, असे वाटायचे. यातून ‘अमर बन्सी’ कार्यक्रमाची निर्मिती झाली. केवळ वाद्यांच्या माध्यमातून आम्ही रसिकांना संगीत अनुभव द्यायला लागलो. २००८मध्ये पहिला कार्यक्रम झाला आणि आतापर्यंत १५५ प्रयोग झाले आहेत. मात्र, आतापर्यंत खुद्द मुंबईत या कार्यक्रमाचा एकही प्रयोग झाला नव्हता. सोSSहम् प्रतिष्ठानच्या माध्यमातून सादर होणाऱ्या या कार्यक्रमासाठी विनीत गोरे, श्रीकांत जोशी यांच्या सगळ्याच टीमचा मी आभारी आहे.

या कार्यक्रमामध्ये किती बासऱ्यांचा वापर होतो?

तबला, ढोलक-ढोलकी, दर्बुका हे दक्षिण आफ्रिकेतील वाद्य, ऑक्टोपॅड, की-बोर्ड या वाद्यांसोबत मी एकूण ३० बासऱ्या वाजवतो. या बासऱ्या ६ इंचांपासून ३८ इंचांपर्यंतची असतात. प्रत्येक बासरीचा कुठे व कसा वापर होऊ शकतो, विविध गाण्यांमध्ये हा वापर कसा केला आहे, याचे प्रात्यक्षिक दाखवले जाते. शास्त्रीय, सुगम संगीत, भक्तिगीत, अभंग, गजल, कव्वाली, लावणी, हिंदी गाणी असा वैविध्यपूर्ण अनुभव या कार्यक्रमाच्या माध्यमातून रसिकांना दिला जातो. यात आरडींनी ट्रेनचा आवाज काढण्यासाठी केलेला पॉलिश पेपरचा वापर किंवा पाण्याच्या बाटलीचा उपयोग करून नाद निर्माण केला जातो आणि हा नाद ज्या गाण्यांमध्ये वापरला आहे ती गाणी सादर केली जातात. याच कार्यक्रमात आमची जुगलबंदीही रंगते.

आतापर्यंत मिळालेला सन्मान, प्रतिक्रिया याबद्दल काय सांगता येईल?

लोकांनी मागणी केली म्हणून हा कार्यक्रम सुरू झाला. अनेकदा बासरी वादन म्हणजे केवळ शास्त्रीय संगीत असणार अशा जाणीवेतून प्रेक्षक येतात. कार्यक्रमाला येण्याआधी अर्ध्या तासात निघायचे अशी मनाची तयारी त्यांनी केलेली असते. मात्र, कार्यक्रम संपेपर्यंत हे प्रेक्षक जागेवरून हलत नाहीत, ते अक्षरशः मंत्रमुग्ध होतात आणि नंतर येऊन याची कबुली देतात, हा सर्वात मोठा गौरव असतो. या व्यतिरिक्त पं. हृदयनाथ मंगेशकर, श्रीनिवास खळे, प्यारेलाल, सुधीर फडके अशा दिग्गजांनी लाइव्ह कार्यक्रमात दाद दिली आहे. हे मोठे संचित आहे. पं. हरिप्रसाद चौरसिया यांनीही १५०व्या कार्यक्रमाला आशीर्वाद दिले.