एखाद्या खेळाडूने निवृत्ती जाहीर केल्यावर त्या खेळात मोठी पोकळी निर्माण होते, तेव्हा खऱ्या अर्थाने त्या खेळाडूचे मोठेपण सिद्ध होत असते. इंग्लिश क्रिकेटमध्ये अशी पोकळी आज अॅलिस्टर कूकच्या निवृत्तीमुळे निर्माण झाली आहे. कसोटी क्रिकेटमध्ये १२ हजारपेक्षा अधिक धावांचा रतीब घालणारा जगातील सहाव्या क्रमांकाचा खेळाडू म्हणून कूकच्या नावाची नोंद आहे. अशी कामगिरी करणारा इंग्लंडमधील तो पहिलाच खेळाडू. यावरून त्याचे मोठेपण सिद्ध व्हावे. कूकचे आयुष्याचे रंगच काही वेगळे आहेत. अॅलिस्टरने शाळेत शिक्षण घेतानाच क्लॅरिनेटचे रीतसर प्रशिक्षण घेतले, त्याचा अगदी मनापासून अभ्यास केला, तालमी केल्या. थोडा मोठा झाल्यावर तो क्रिकेटही खेळू लागला. १३व्या वर्षी बेडफोर्ड या फक्त मुलांच्या शाळेत त्याची संगीतकला बहरली. तिथे पियानो आणि सॅक्सोफोन वाजविण्यास तो शिकला. संगीताने आयुष्याची सुरुवात झालेला अॅलिस्टरने नंतरच्या काळात आपल्या बॅटच्या तालावर चाहत्यांना मंत्रमुग्ध केले. बेडफोर्ड शाळेत असताना प्रतिस्पर्धी मेरिलिबोन क्रिकेट क्लबला एक खेळाडू कमी पडत होता. तेव्हा त्यांनी अॅलिस्टरला संघात घेतले आणि त्याने पहिल्याच सामन्यात शतक ठोकले. त्याचा हा प्रवास मग एसेक्सकडून कौंटी क्रिकेट आणि मग इंग्लिश क्रिकेट असा सुरू राहिला. वयाच्या २१व्या वर्षी २००३मध्ये त्याला इंग्लंड संघात स्थान मिळाले आणि त्याने पदार्पणातच १००० धावा केल्या. २०१२मध्ये तो कप्तानही झाला. कूकच्या क्रिकेट कारकीर्दीवर नजर टाकली तर लक्षात येते की, कसोटी क्रिकेट हेच त्याचे सर्वस्व राहिलेले आहे. अवघे क्रिकेटजगत टी-२०मधील पैसा, प्रसिद्धी याच्या मागे लागलेले असताना कूकने मात्र अस्सल क्रिकेट म्हणून ओळखल्या जाणाऱ्या कसोटीवरच श्रद्धा ठेवली. असा खेळाडू निवृत्त होणे म्हणजे त्या खेळात पोकळी निर्माण होणे नाही का ?
अवलिया अॅलिस्टर
एखाद्या खेळाडूने निवृत्ती जाहीर केल्यावर त्या खेळात मोठी पोकळी निर्माण होते, तेव्हा खऱ्या अर्थाने त्या खेळाडूचे मोठेपण सिद्ध होत असते...
Maharashtra Times 10 Sep 2018, 4:00 am