किशोरी पेडणेकर
मुंबईच्या महापौरपदी किशोरी पेडणेकर यांची झालेली बिनविरोध निवड म्हणजे निष्ठावंत या शब्दाला जागणाऱ्या सामान्य शिवसैनिकाला पक्षाने दिलेला मान. आदित्य ठाकरेंसाठी वरळी मतदारसंघातील प्रचाराची धुरा जोरकसपणे सांभाळण्याची 'बक्षिसी' त्यांना महापौर पदाच्या निमित्ताने मिळाली. गिरणी कामगाराची मुलगी, रुग्णालयातील परिचारिका, सामान्य कार्यकर्त्या ते थेट मुंबईच्या पहिल्या नागरिक त्यांचा प्रवास कौतुकास्पद आहे. बालपणी गिरणी कामगारांच्या संघर्षात झालेली जडणघडण, विवाहानंतर न्हावा शेवा येथील रुग्णालयात परिचारिकेची नोकरी यामुळे राजकीय प्रवासात आक्रमकता आणि ममता हे दोन्ही गुण त्यांच्यात समानतेने दर्शन घडवताना दिसतात. या गुणांना समाजकार्याची जोड मिळाली. लोअर परळ, वरळी आणि आजुबाजूच्या परिसरात त्यांनी शिवसेनेकडून काम करण्यास सुरुवात केली. उपविभाग संघटक म्हणून भरीव योगदान दिल्यानंतर २००२मध्ये त्या पहिल्यांदाच नगरसेवक म्हणून निवडून आल्या. नंतर २०१२ आणि २०१७ मध्येही त्यांनी आपले नगरसेवक पद कायम राखले. या दरम्यान बाल कल्याण आणि स्थापत्य समिती शहर अध्यक्षाची धुराही समर्थपणे सांभाळली. प्रत्येक समितीच्या बैठकीत पक्षाची खिंड आक्रमकपणे लढवल्याने पक्षप्रमुखांना देखील स्वतःची दखल घेण्यास भाग पाडले. कारकिर्दीत किंचितसा फटकळपणा काही प्रमाणात नडला, मात्र आक्रमकता हा स्वभाव किंबहुना पक्षधर्म असल्याने ते चालून गेले. बृहन्मुंबई महापालिकेचे महापौरपद ही काही साधी गोष्ट नाही. फटकळ स्वभावाला अंशतः मुरड घातली, की पालिकेच्या इतिहासात ठळकपणे नाव कोरणे अधिक सोपे जाईल.