ताईंचे विशेष कौतुक!

आमच्या प्रीतीताई गुणीच. नवऱ्याची कायम काळजी वाहतात. रविचंद्रन अश्विन; म्हणजे आमचे भावोजी हेही ताईंच्या शब्दाबाहेर नाहीत. ताईंनी सांगितले आणि भाऊंनी केले नाही, असे सहसा होत नाही. ताईंचा नवऱ्यावर बालपणापासून जीव. आता दोघांच्याही आयुष्यात दोन लेकी. पाच आणि सहा वर्षांच्या दोन लेकी आणि अधिकचा नवरा, अशा एकूण तिघांना सांभाळणे गंमत नाही. ताईंचे यासाठी विशेषकरून कौतुक वाटते.

एके दिवशीची गोष्ट. एक दिवस लहानी आध्या उठली पहाटे रडत रडत. हे रडणेही कसे? रिव्हर्सस्विंग यॉर्कर म्हणू नका, बाउन्सर म्हणू नका. आउटस्विंग, इनस्विंग म्हणू नका. छोट्या ताई ऐकेचना! तरीही भावोजींनी संयमाने घेतले. झोप झाली नसेल. जरा उशिराच पाठ टेकली असेल. कदाचित मनी हाइस्टच्या चौथ्या सिझनमध्ये रमले असतील ते. काहीही असो, त्या सिच्युएशनमध्ये भावोजी संयमाने वागले. या वागण्याचे प्रीतीताईंना कोण कौतुक. दृष्टच काढली असेल त्यांनी तेवढ्या घाईत!

आता तुम्ही म्हणाल, पहाटेची ही घडामोड तुम्हाला कशी ठाऊक? तर, खुद्द ताईंनीच हे सांगितले. हे कळण्यासाठी कारण ठरलेल्या टिम पेन याचे याठिकाणी मन:पूर्वक आभार व्यक्त करतो. हा टिम्या म्हणजे ऑस्ट्रेलियाच्या क्रिकेट संघाचा कॅप्टन कम विकेटकीपर. तिसरा कसोटी सामना जिंकता सामना हातचा सुटू लागल्याचे पाहून त्याने रडीचा डाव चिडीवर नेला. भावोजींना डिचवणे सुरू केले. भावोजींना तो गाब्यात पाहून घेईन काय म्हणे, तुझ्या टीममध्ये तू फारसा कुणाला आवडत नाही काय म्हणे... आपण टोचू टोचू बोलत राहू आणि 'अॅश' खचू खचू जाईन, असे त्याला वाटले. भावोजी या सापळ्यात अडकलेही. उलटून बोलले. 'भारतात ये बापू, पाहून घेईन म्हणाले. 'तुझी ती शेवटची मॅच समज', अशी धमकीही जोशाजोशात दिली.

नवऱ्याला पुरत्या ओळखून असलेल्या प्रीतीताईंना या सर्व परिस्थितीची पूर्ण कल्पना आली. आता त्यांना हस्तक्षेप करणे मस्ट वाटले. तिघांना सांभाळता सांभाळता दररोज केल्या जाणाऱ्या संयमाच्या क्रॅश कोर्सची यामागे अंत:प्रेरणा होती. या क्रॅश कोर्सला स्मरून प्रीतीताईंनी क्षणाचीही उसंत न घेता एक संदेश लिहिला, 'आध्या पहाटे तीन वाजता नुस्ती रडत आहे, असे समज आणि दुर्लक्ष कर.' हा संदेश त्यांनी तातडीने ट्विटर पक्ष्याच्या हाती दिला. या पक्ष्याने तो लगबगीने भावोजींपर्यंत पोहोचवला. (निरोपाचे हे आदान-प्रदान कसे झाले याच्या तूर्त नोंदी नाहीत, पण चेंडू टोलावताना झालेल्या वेदनेमुळे त्यांनी वर आकाशाकडे पाहिले असता ट्विटरचा पक्षी त्यांना दिसला असावा. हा सूचक इशारा कळून तत्क्षणी ताईंची आठवण झाली असावी.) त्यानंतर भावोजींनी संयम राखला. ते चेंडूंचा मार खात राहिले, पण टिकून राहिले. पुन्हा संयम ढळू दिला नाही. हनुमाच्या साथीनं मॅच ड्रॉ केलीच. (टिम्याने आता माफी मागितली आहे म्हणे. मॅचनंतर बोनी वहिनी आणि प्रीतीताईंचे बोलणे झाल्याचेही कळते आहे.)

आता भावोजी शेवटच्या सामन्याची तयारी करीत आहेत आणि प्रीतीताई उद्याच्या संक्रांतसणासाठी उखाण्याचा सराव...

-चकोर