मित्रहो, स्वप्नांच्या दुनियेत तुम्हा सगळ्यांचं स्वागत. तुम्ही म्हणाल, आता ही काय नवीन भानगड? पण, ही भानगड वगैरे काही नाही. अहो, हल्ली खऱ्याखुऱ्या दुनियेत मनमौजी विहार करणं अवघड बनलं आहे. साध्या साध्या गोष्टीही साध्य होताना दिसत नाहीत. त्या सर्व इच्छा, आकांक्षा इथं पूर्ण करता येतात. खरं तर स्वप्नांचा वास्तवाशी काही ना काही संबंध असतोच, असं मानणाऱ्यांपैकी आम्ही! मग ती स्वप्न पहाटेची असो वा टळटळीत दुपारची. असंही व. पु. काळेंनी म्हटलंच आहे, 'माणसाला काही ना काही छंद हवा, स्वप्न हवीत. पुरी होणारी किंवा कायम अपुरी राहणारी, त्यातून तो स्वत:ला हरवायला शिकतो. सापडवायला शिकतो.' म्हणूनच आम्हालाही छंद जडलेला, स्वप्न बघण्याचा. दिवसाढवळ्या, उभ्याउभ्या, कधी चक्षू उघडे ठेवून वा कधी ते मिटूनही! तसे आम्ही बालपणापासूनच स्वप्नाळू. चार पुस्तकं शिकल्यानंतर मिळवायचा होता रोजगार; पण झालो बेरोजगार. असो. आमच्या स्वप्नांच्या आड कोण आलं, ही बरीच 'लंबी कहानी' आहे. त्याबद्दल पुन्हा कधी तरी.
शेतकरी पीकपाण्याचं स्वप्नं बघतोय; पण त्याच्या शिवारात पाऊस काही पडत नाही. गरज नाही तिकडं तो पडतोय! हवामान खात्यालाही धो धो सरींचा अंदाज खरा ठरावा, असं कधी तरी वाटतच असेल ना? राजकारण्यांचंच बघा, त्यांना साधीसुधी नव्हे, तर दिवास्वप्नच पडतात. बिहारमधला 'चिराग' पेटण्यापूर्वीच विझला. त्याचंही काही तरी ड्रीम होतंच ना? बिचाऱ्याचा काकानं गळा कापला. आता काकासुद्धाऽऽऽ! आपल्याकडंही स्वप्नपूर्तीसाठी काका-पुतण्यांच्या उटारेटा चालूच आहेत. कुणाला पाडापाडीचं स्वप्नं पडतंय, तर कुणा बड्याला जोडाजोडीचं? एक दादा तर ध्यानी मनी नुसतंच 'पडलं पडलं' ओरडत फिरताहेत. रोज सकाळी उठल्यावर आज तरी काहीतरी घडेल, असं त्यांना वाटतंच आहे. दुसरे दादादेखील अनेकांना स्वत:प्रमाणं 'नाना' स्वप्नं बघण्याचा सल्ला-इशारा देतात ना! अहो, 'नाना' त्यांचा चिरकाल तरुण नेता आणि त्यांची पार्टीही गतवैभव परत मिळाल्याचे मनमांडे खातच असेलच ना? कोकणातला कुणी तर सतत दिल्लीवारीच्या भ्रमात आहे. आपण राजधानीतच असल्याचा भास त्यांना होतोय. आज, उद्या नक्की येईल तिकडून कॉल, आपण लवकरच मिरवू पुन्हा लालदिव्यात, अशी स्वमनाची समजूत ते काढतच असतील ना!
अहो, पुढाऱ्यांचं काय घेऊन बसलात, तुमच्या-आमच्यासारख्या सामान्यांचं बघा ना, पन्नास रुपयांत लिटरभर गाडीचं अन् भाजीचंही तेल मिळेल, अशी भाबडी आशा आहेच ना? खात्यावर पंधरा लाख जमा झाल्याचं स्वप्नातलं स्वप्नं अजूनही पडतंच ना! असो. ज्याचं पोट रिकामं आहे त्याला भाकरीचं आणि ज्याचं भरलंय त्याला 'वेट' घटल्याचं स्वप्न पडणारच की होऽऽऽ. जितकी माणसं, तितकी कैकपटीनं स्वप्नं. शेवटी आशेवरच जगायचं आता. म्हणून म्हणतो स्वप्न बघत राहा, रोज ती आठवत राहा. नाहीच घडली स्वप्नं, तरी बिघडलं कुठं? जाब विचारतो कोण? मग काढा झोपा, बघा स्वप्नातली स्वप्नं! आणखी चार-दोन वर्षं आपण दुसरं करणार तरी काय? आमच्या सौ.देखील सांगतात, ह्यांना स्वप्न बघण्याशिवाय दुसरं येतं तरी काय?
- चकोर
शेतकरी पीकपाण्याचं स्वप्नं बघतोय; पण त्याच्या शिवारात पाऊस काही पडत नाही. गरज नाही तिकडं तो पडतोय! हवामान खात्यालाही धो धो सरींचा अंदाज खरा ठरावा, असं कधी तरी वाटतच असेल ना? राजकारण्यांचंच बघा, त्यांना साधीसुधी नव्हे, तर दिवास्वप्नच पडतात. बिहारमधला 'चिराग' पेटण्यापूर्वीच विझला. त्याचंही काही तरी ड्रीम होतंच ना? बिचाऱ्याचा काकानं गळा कापला. आता काकासुद्धाऽऽऽ! आपल्याकडंही स्वप्नपूर्तीसाठी काका-पुतण्यांच्या उटारेटा चालूच आहेत. कुणाला पाडापाडीचं स्वप्नं पडतंय, तर कुणा बड्याला जोडाजोडीचं? एक दादा तर ध्यानी मनी नुसतंच 'पडलं पडलं' ओरडत फिरताहेत. रोज सकाळी उठल्यावर आज तरी काहीतरी घडेल, असं त्यांना वाटतंच आहे. दुसरे दादादेखील अनेकांना स्वत:प्रमाणं 'नाना' स्वप्नं बघण्याचा सल्ला-इशारा देतात ना! अहो, 'नाना' त्यांचा चिरकाल तरुण नेता आणि त्यांची पार्टीही गतवैभव परत मिळाल्याचे मनमांडे खातच असेलच ना? कोकणातला कुणी तर सतत दिल्लीवारीच्या भ्रमात आहे. आपण राजधानीतच असल्याचा भास त्यांना होतोय. आज, उद्या नक्की येईल तिकडून कॉल, आपण लवकरच मिरवू पुन्हा लालदिव्यात, अशी स्वमनाची समजूत ते काढतच असतील ना!
अहो, पुढाऱ्यांचं काय घेऊन बसलात, तुमच्या-आमच्यासारख्या सामान्यांचं बघा ना, पन्नास रुपयांत लिटरभर गाडीचं अन् भाजीचंही तेल मिळेल, अशी भाबडी आशा आहेच ना? खात्यावर पंधरा लाख जमा झाल्याचं स्वप्नातलं स्वप्नं अजूनही पडतंच ना! असो. ज्याचं पोट रिकामं आहे त्याला भाकरीचं आणि ज्याचं भरलंय त्याला 'वेट' घटल्याचं स्वप्न पडणारच की होऽऽऽ. जितकी माणसं, तितकी कैकपटीनं स्वप्नं. शेवटी आशेवरच जगायचं आता. म्हणून म्हणतो स्वप्न बघत राहा, रोज ती आठवत राहा. नाहीच घडली स्वप्नं, तरी बिघडलं कुठं? जाब विचारतो कोण? मग काढा झोपा, बघा स्वप्नातली स्वप्नं! आणखी चार-दोन वर्षं आपण दुसरं करणार तरी काय? आमच्या सौ.देखील सांगतात, ह्यांना स्वप्न बघण्याशिवाय दुसरं येतं तरी काय?
- चकोर