पोलादी पकडीचे पुतीन
चर्चेतील चेहरा - व्लादिमिर पुतीन
रशियाच्या अध्यक्षपदाची चौथ्यांदा शपथ घेऊन वाल्दिमिर पुतीन यांनी आपली पकड किती पोलादी आहे हेच दाखवून दिले आहे. पोलादी पडद्यासाठी प्रसिद्ध असलेल्या तत्कालीन साम्यवादी सोव्हिएत रशियाचे विघटन झाल्यानंतर रशियाच्या राजकारणात उदयाला आलेले पुतीन हे एकेकाळी केजीबी या गुप्तहेर संघटनेत होते. राजकारणात ते आले, ते बोरिस येल्त्सिन यांच्या अध्यक्षपदाच्या काळात. येल्त्सिन यांनी त्यांची पंतप्रधानपदी नियुक्ती केली तेव्हाच अनेकांच्या भुवया उंचावल्या होत्या. कालांतराने येल्त्सिन आजारी पडले आणि पुतीन यांनी रशियाच्या राजकारणावर पकड बसविली ते आजपर्यंत कायम आहे. नुकत्याच झालेल्या निवडणुकीत त्यांना ७० टक्के नागरिकांनी पाठिंबा दिला आहे. रशियाचा चेहरामोहरा बदलण्याचा संकल्प पुतीन यांनी सोडला आहे. शालेय जीवनामध्ये ज्युदो आणि सांबो या खेळामध्ये राष्ट्रीय पातळीपर्यंत मजल मारलेल्या पुतीन यांनी आंतरराष्ट्रीय कायद्यामधील पदवी घेतली आहे. जर्मन भाषेवर प्रभुत्व मिळविलेल्या पुतीन यांनी केजीबीमध्ये काम करताना पूर्व जर्मनीमध्येही काम केले आहे. रशियात परतल्यानंतर सार्वजनिक जीवनामध्ये आलेल्या पुतीन यांनी पंतप्रधान ते अध्यक्ष हा प्रवास वेगाने केला आहेच. गेली अठरा वर्षे विविध कारणांनी चर्चेत राहिलेल्या पुतीन यांनी रशियाचे जागतिक नकाशावरील स्थान अबाधित ठेवण्यासाठी सर्व ते मार्ग वापरले आहेत. कदाचित म्हणूनच पुन्हा एकदा रशियन जनतेने त्यांच्याकडे सूत्रे सोपविली आहेत. मंदीच्या गर्तेतून रशियाला बाहेर काढण्याचे आव्हान त्यांच्यासमोर आहे.