सच्चा कार्यकर्ता
नोंद : शांताराम कुंजीर
मराठा क्रांती मोर्चाचे राज्य समन्वयक शांताराम महादेव कुंजीर यांच्या निधनाने मराठा आरक्षण चळवळीतील सच्चा कार्यकर्ता हरपला आहे. क्रियाशीलता, वाचन, अभ्यासपूर्ण विवेचन, कळकळीची भावना, संवेदनशीलता, निर्भीड वृत्ती, प्रसंगी पदरमोड करून मोर्चे, आंदोलने, धरणे, सामाजिक उपक्रमांत अग्रभागी राहण्याची ऊर्जा अन् विचारांशी बांधिलकी, हे अस्सल कार्यकर्त्याचे गुण शांताराम बापूंमध्ये होते. त्या जोरावरच शिव-शाहू-फुले-आंबेडकर चळवळीचा वसा त्यांनी जपला. त्यांचा जन्म पुणे जिल्ह्यातील पुरंदरमधील वाघापूरचा. परिस्थिती बेताची असल्याने, लहानपणापासून काबाडकष्ट उपसले. उमेदीच्या वयात नोकरी, एका हॉटेलमध्ये व्यवस्थापक, छोटे मोठे व्यवसाय करत जगण्याची लढाई लढत असताना, त्यांची ओळख शिवविचारांशी झाली. त्यातून त्यांनी स्वतःला चळवळीत झोकून दिले. मराठा महासंघ, मराठा सेवा संघ, संभाजी ब्रिगेड आदी संघटनांद्वारे ते विविध सामाजिक लढ्यांत आघाडीवर राहिले. अधिवेशनांचे आयोजन असो की मोर्चे, शांताराम बापूंची सक्रियता इतरांसाठी प्रेरणादायी असे. मराठा आरक्षणासाठीच्या प्रत्येक आंदोलनात त्यांचे मोलाचे योगदान आहे. डीएड, बीएड विद्यार्थ्यांच्या स्टायपेंडचा आणि भरतीचा प्रश्न, शिवजयंतीची तारीख निश्चित करण्यासाठीचा लढा, जागतिक शिवजयंती दिनाचे समन्वयन, शिवशाहू यात्रा, मराठा क्रांती मूक मोर्चे आणि राज्यव्यापी शेतकरी संप आदींचे नियोजन, शिवाजी व्यायाम मंडळाचे काम, 'सारथी'च्या विद्यार्थ्यांचे प्रश्न सोडविण्यासाठी पाठपुरावा, अशा प्रत्येक कार्यात ते आघाडीवर होते. कार्यकर्ता कसा असावा, याचा वस्तुपाठ घालून देणाऱ्या शांताराम बापूंना श्रद्धांजली.