आता क्रीडाक्षेत्रात डॉ. विजय पाटील हे नाव चांगले परिचयाचे झाले आहे. नुकत्याच झालेल्या मुंबई क्रिकेट असोसिएशनच्या निवडणुकीत अध्यक्ष म्हणून पाटील यांची बिनविरोध निवड झाली. खरेतर, मुंबई क्रिकेट असोसिएशनवर काम करण्याची ही त्यांची पहिलीच वेळ नाही. याआधीही, उपाध्यक्ष म्हणून त्यांनी काम केले आहे आणि अध्यक्षपदाच्या निवडणुकीत शरद पवार यांच्यासारख्या दिग्गजासमोर उभे राहण्याची हिंमतही दाखविली आहे. तेव्हा अध्यक्षपदापर्यंत त्यांना झेप घेणे शक्य झाले नव्हते. यावेळी मात्र त्यांच्याशिवाय दुसरा पर्यायच समोर नव्हता. त्यामुळे त्यांना या पदासाठी विरोधही झाला नाही. जे दोन गट निवडणुकीत उभे होते त्यांनी अध्यक्षपदाचा उमेदवार म्हणून पाटील यांनाच समर्थन दिल्याने सगळे मार्ग मोकळे झाले. विजय हे त्रिपुरा तसेच बिहारचे माजी राज्यपाल व शिक्षणमहर्षी डी. वाय. पाटील यांचे चिरंजीव. पण राजकारणी म्हणून स्वतःची ओळख निर्माण न करता एक क्रीडाप्रेमी म्हणून त्यांनी स्वतःचे स्थान निर्माण केले. केवळ निवडणूक जिंकून एखाद्या संघटनेवर अध्यक्ष म्हणून विराजमान होण्याचा त्यांचा पिंड नाही. खेळासाठी आपण काही योगदान देऊ शकतो का, या विचारातून नवी मुंबई येथे डी. वाय. पाटील हे क्रिकेट व फुटबॉलचे भव्य स्टेडियम त्यांनी उभे केले. त्यात जागतिक दर्जाच्या अत्याधुनिक सोयीसुविधा उपलब्ध केल्या. या स्टेडियमला ब्रिटिश आर्किटेक्ट जर्नलने जगातील पहिल्या सहा स्टेडियममध्ये स्थान दिले. स्टेडियमसोबतच आपल्या डी. वाय. पाटील क्रिकेट संघांच्या माध्यमातून त्यांनी क्रिकेटपटूंना नोकऱ्या उपलब्ध करून दिल्या. राजस्थानातील जेजेटी विद्यापीठातून त्यांना मानद डॉक्टरेट मिळाली आहे. एमसीए क्रिकेट संघटनेच्या अध्यक्षपदावर विराजमान होण्याची संधी त्यांना मिळाल्याने मुंबईतील क्रिकेटमधली मरगळ दूर होण्यास मदत होईल, अशी आशा आहे.
डॉ. विजय पाटील
आता क्रीडाक्षेत्रात डॉ. विजय पाटील हे नाव चांगले परिचयाचे झाले आहे. नुकत्याच झालेल्या मुंबई क्रिकेट असोसिएशनच्या निवडणुकीत अध्यक्ष म्हणून पाटील यांची बिनविरोध निवड झाली. खरेतर, मुंबई क्रिकेट असोसिएशनवर काम करण्याची ही त्यांची पहिलीच वेळ नाही.
महाराष्ट्र टाइम्स.कॉम 7 Oct 2019, 5:33 am