कलागुणांचा बादशहा

कॉलेज लाइफ म्हटले की दिवसभर टाइमपास, मज्जा मस्ती असा तरुणांचा दिनक्रम असतो. सकाळी कॉलेजमधून बाहेर पडले की त्यानंतर दिवसभर भटकून मग स्वारी संध्याकाळच्या वेळी घरी जाते. डोंबिवलीतील योगेश रायकर मात्र याला अपवाद आहे. कॉलेजमध्ये मास मीडियाचे शिक्षण घेताना नृत्य, अभिनय, चित्रकला यांसारख्या वेगवेगळ्या कलांमध्ये तो प्रगती करत आहे. त्याचबरोबर शहरातील विद्यार्थ्याच्या शिक्षणासाठीसुद्धा तो हातभार लावत आहे. डोंबिवलीतील संस्थाच्या मदतीने सामाजिक उपक्रमांमध्ये त्याचा सहभाग आहे. सर्वच क्षेत्रामध्ये भरीव कामगिरी करून सध्याच्या विद्यार्थ्यासाठी त्याने एक नवा आदर्श निर्माण केला आहे.

लहानपणापासूनच योगेशला नृत्याची आवड होती. शाळेतील वेगवेगळ्या स्पर्धामध्ये भाग घेऊन त्याने बक्षिसे प्राप्त केली. त्यानंतर पायाच्या समस्येमुळे यापुढे नृत्यकला सुरू न ठेवण्याचा सल्ला त्याला डॉक्टरांनी दिला. पण मोठा धोका पत्करून त्याने काम सुरू केले आणि आज भारताबाहेरसुद्धा त्याने आपल्या नृत्याचा ठसा उमटवला आहे. भारताबाहेर पार पडणाऱ्या स्पर्धामध्ये दरवर्षी तो सहभागी होतो. महाराष्ट्र सरकारच्या वतीनेसुद्धा त्याच्या कार्याचा गौरव करण्यात आला आहे. सालसा, वेस्टर्न या नृत्यामध्ये त्याने विशेष नैपुण्य प्राप्त केले आहे. विद्यार्थ्यांना नृत्याचे धडेही तो सध्या देत आहे.

नृत्याबरोबरच शालेय विद्यार्थ्यांना तो अभ्यासाबाबत मार्गदर्शन करतो. या विद्यार्थ्यांचा सर्वांगीण विकास व्हावा, यासाठी त्याचा प्रयत्न सुरू असतो. गरीब विद्यार्थ्यांचा विकास व्हावा, यासाठी डोंबिवलीतील सामाजिक संस्थाच्या मदतीने तो प्रयत्न करत आहे.

कामानिमित्त वेगवेगळ्या ठिकाणी प्रवास करत असल्यामुळे त्याला जे अनुभव येतात ते तो कथांच्या माध्यमातून मांडतो. महाविद्यालयातील विद्यार्थ्यांना एकत्र करून त्याने स्वतःचा ग्रुप तयार केला असून सामाजिक विषयांवर आधारित लघुपटांची निर्मिती तो सतत करतो असतो. योगेशने दिग्दर्शन केलेल्या ब्रोकन पेन्सिल या लघुपटाची युनेस्कोच्या स्पर्धेमध्ये अंतिम फेरीमध्ये निवड झाली होती. याचबरोबर एक उत्तम कलाकार म्हणून तो ओळखला जातो. एवढ्या वेगवेगळ्या क्षेत्रांमध्ये काम करत असल्यामुळे खूप गोष्टी शिकायला मिळत असल्याचे योगेश सांगतो.