अॅलेक पदमसी नावाचा ब्रॅण्ड

एखाद्याच्या घरात, एखाद्याच्या मनात तुम्हाला कुठवर शिरता येते, यावर तुमचे यश अवलंबून असते. दूरदर्शनवरील रामायण आणि महाभारताने, ज्या काळात घराघरातील मनांवर अधिराज्य स्थापित केले होते, इतके की रस्ते ओस पडायचे, लग्नाचे मुहूर्त टळायचे, त्याच काळात 'आय लव्ह यू रसना' म्हणणाऱ्या एका गोड चिमुकलीने आपल्या मनात घर केले होते. 'सर्फ'वाली ललिताही आपली वाटू लागली होती. बेफाम फेसाळणाऱ्या धबधब्याखाली स्वच्छंद विहार करणाऱ्या 'लिरील गर्ल'ने तर तेव्हा वेडच लावले होते. हे वेड लावण्याचे सारे श्रेय जाते अॅलेक पदमसी या जाहिरातीच्या क्षेत्रातील दादा माणसाला. दूरदर्शनवर जेव्हा ठोकळेबाज जाहिराती झळकत होत्या, मख्ख चेहऱ्यांनी दिलेले संदेश माहितीपटाच्या साच्यातून बाहेर पडत होते तशा काळात या अवलीयाने एका सुंदर तरुणीच्या हातात एक साबण देऊन तिला पचमढीच्या जंगलातील एका धबधब्याखाली उभे केले होते. बुटपॉलिशचे उत्पादन पोहोचविण्यासाठी चार्ली चॅप्लिनसारखी व्यक्तिरेखा वापरली होती. त्याच्या अशा कल्पक भराऱ्यांनीच बजाजच्या उत्पादनांवर एका काळात 'हमारा बजाज' असा ठप्पा उमटविला. एकीकडे त्यांचा जाहिरात क्षेत्रातील हा सिद्धहस्त वावर मैलाचा दगड ठरला तर, दुसरीकडे रंगभूमीवरील; विशेषत: इंग्रजी रंगभूमीवरील कामगिरी त्यांच्यातील कलावंताला दाद देऊन गेली. रिचर्ड अॅटनबरो यांच्या 'गांधी' चित्रपटातील मोहम्मद अली जीना यांची महत्त्वपूर्ण भूमिका पदमसी यांनी साकारली होती. ते इंग्रजी रंगभूमीवरचे ख्यातकीर्त कलावंत होते. कमालीची निर्मितीमूल्ये आणि मोठी गुंतवणूक असलेली नाटके पदमसी यांनी इंग्रजी रंगभूमीवर आणली. 'इव्हिटा', 'तुघलक', 'ब्रोकन इमेजेस' या त्यांच्या नाटकांना इंग्रजी नाटकांच्या चाहत्यांनी उचलून धरले होते. भारत सरकारचा 'पद्मश्री' तसेच संगीत नाटक अकादमीचा पुरस्कार त्यांना मिळाला होता. तब्बल नव्वद वर्षे जगलेले हे प्रतिभेचे वादळ आता शमले असले तरी या वादळाच्या अस्तित्वाच्या खुणा आणि त्यांनी आपल्या कर्तृत्वाने लोकांच्या मनावर उमटविलेली अमीट छाप कुणी मिटवू शकणार नाही. बाजारपेठेतील उत्पादनांना ब्रॅण्ड बनविताना अॅलेक पदमसी हे स्वत:च एक ब्रॅण्ड बनले. बाजारात अनेक ब्रॅण्ड्स येतात आणि जातात. अॅलेक पदमसी नावाच्या ब्रॅण्डची बरोबरी कदाचितच कुणी करू शकेल.