कौतुक आणि खंत

काँग्रेस पक्ष बर्फही थंड करून खातो असं म्हणतात. त्यामुळे महाविकास आघाडीत येण्याआधी या संभाव्य आघाडीचे काँग्रेसच्या जनाधारावर काय परिणाम होतील, वगैरे अनेक बाबी दिल्लीपासून ते गल्लीपर्यंतच्या पुढाऱ्यांनी आपापल्या पद्धतीने तपासून पाहिल्या. काँग्रेस पक्ष सरकारमध्ये येणार की बाहेरून पाठिंबा देणार इथपर्यंतच्या चर्चा त्यावेळी काँग्रेस वर्तुळात रंगल्या होत्या. मात्र सरकारमध्ये सामील झाल्यानंतर काँग्रेसच्या एकेका नेत्याचे जे रुसवे फुगवे सुरू झालेले आहेत, ते पाहता, काँग्रेस पक्षश्रेष्ठींनी बाहेरूनच पाठिंबा दिला असता तर बरे झाले असते की काय असे वाटू लागले आहे. शिवसेनेतून राणेंसोबत काँग्रेसवासी झालेल्या विजय वडेट्टीवार यांना ओबीसी, भटक्या जाती व विमुक्त जमाती हे खातं दिल्याने आपल्याला दुय्यम खातं मिळाल्याच्या नाराजीचे त्यांनी थेट प्रदर्शनच केले. मंत्रिमंडळाच्या बैठकांवर तर त्यांनी बहिष्कार घातलाच, पण विधिमंडळाच्या अधिवेशनालाही त्यांनी दांडी मारली. आता त्यांच्याकडे मदत व पुनर्वसन हे खातं देऊन त्यांचा राग शांत करण्यात आला आहे. दुसरीकडे प्रदेशाध्यक्ष बाळासाहेब थोरात यांनी मात्र स्वतःकडे आलेले कोल्हापूर जिल्ह्याचे पालकमंत्रीपद सोडून पक्षाला एक सुखद धक्काच दिला आहे. इथे छोट्या मोठ्या पदांसाठी रुसवे फुगवे सुरू असताना थोरात यांनी कोल्हापूरचे पालकमंत्रीपद सतेज पाटील यांना द्यावे, अशी मुख्यमंत्र्यांना विनंती केली, ते कौतुकास्पद आहे. खरंतर बाळासाहेब थोरात यांच्या नेमस्त स्वभावाबाबत पक्षातील अनेकजण टीका करत असतात. मात्र स्वतःला आक्रमक म्हणवणारे, जनतेची सेवा करण्यासाठी अमुकच खाते हवे या हट्टासाठी जो आक्रमक बाणा दाखवतात तो याची खंत कार्यकर्ते व्यक्त करत आहेत. भाजपसारखा विरोधी पक्ष समोर असताना अशा शुल्लक गोष्टींवर रुसव्या फुगव्यांच्याच बातम्या पेरण्यात नेते मश्गूल राहिले तर सत्तेचा गालिचा पायाखालून सरकायला वेळ लागणार नाही, याची त्यांनी जाणीव ठेवलेली बरी.