शिवसेना व भारतीय जनता पक्षातील संघर्षाला पालघर लोकसभा निवडणुकीच्या निमित्ताने निर्णायक वळण मिळाले असून, मुख्यमंत्र्यांची ऑडिओ क्लिप जाहीर करून उद्धव ठाकरेंनी या संघर्षावर अखेरची काडी टाकली आहे. शिवसेनेने उमेदवार पळविल्याने भाजपचा थयथयाट झाला असतानाच या क्लिपमुळे गेल्या चार वर्षांत मुख्यमंत्री प्रथमच अडचणीत आलेले दिसले. माध्यमांच्या गळ्यातील ताईत म्हणून परिचित असलेल्या फडणवीस यांनी या वादात पत्रकारांनाही कानपिचक्या दिल्याने त्यांचा संयम ढळल्याचे दुर्लभ चित्रही पहावयास मिळाले. सदर क्लिप आपलीच आहे; पण ती एडिट करून प्रसिद्ध केली असून, त्यातील पूर्ण भाग दाखिवला असता तर शिवसेनेला तोंड दाखवायला जागा राहिली नसती, असा दावा मुख्यमंत्री देवेन्द्र फडणवीस यांनी केला आहे. उद्धव ठाकरे यांनी मात्र थेट मुख्यमंत्र्यांनाच लक्ष्य केले आहे. युतीचा डोलारा सांभाळण्याची जीवापाड कसरत करताना फडणवीस यांनी नेहमीच उद्धवना सांभाळून घेतल्याचा भाजपमध्येच आक्षेप होता. त्यापार्श्वभूमीवर मुख्यमंत्री-उद्धव यांच्यातील हा कलगीतुरा खेदजनक, अशोभनीय तर आहेच; शिवाय पातळी सोडणाराही आहे. दरवेळेस मुख्यमंत्र्यांनी मोठ्या कौशल्याने त्या त्या वेळची परिस्थिती हाताळण्यात यश मिळविले होते. आता मात्र अग्निशामकावरच पेटते बोळे टाकून शिवसेनेने एल्गार केला आहे. या क्लिपमधील साम-दाम-दंड-भेद अशा सर्व आयुधांचा वापर करण्याबाबतचे मुख्यमंत्र्यांचे आवाहन त्यांच्या प्रतिमेला साजेसे नसून, धक्कादायक आहे. हा सारा कूटनीतीचा भाग असल्याची सारवासारव केली जात असली, तरी शिवसेनेला त्यांच्याच भाषेत उत्तर देण्याचा हा प्रयत्न अंगाशी येऊ शकतो. मुख्यमंत्र्यांना खिजविण्यात शिवसेना आता अधिक आक्रमक होऊ लागली असून, यानिमित्ताने त्यांच्या या चक्रव्यूहात मुख्यमंत्री अलगद सापडले आहेत. वास्तविक शिवसेनेपेक्षा भाजप व मुख्यमंत्र्यांची प्रतिष्ठा पणास लागलेली असल्याने अधिक जबाबदारीची व संयमाची अपेक्षा होती.
