मुलगा आणि मुलगी यांच्या जन्माबाबत वैद्यकीय तथ्याला छेद देणारे आणि अंधश्रद्धेला खतपाणी घालणारे वक्तव्य केल्याने वादाच्या भोवऱ्यात अडकलेल्या निवृत्ती देशमुख महाराज (इंदोरीकर) यांनी अखेर दिलगिरी व्यक्त केल्याने याबाबतच्या वादावर पडदा पडायला हरकत नाही. त्याचबरोबर या वादाच्या अनुषंगाने होत असलेले राजकारणही संबंधितांनी थांबवायला हवे. आपल्या समाजात कीर्तनाची मोठी परंपरा असून, दीर्घकाळ याच माध्यमातून समाज प्रबोधन करण्यात येत आहे. धर्मातील आशय उलगडून दाखवितानाच न्यायबुद्धी, प्रामाणिकपणा, सेवातत्परता, कर्तव्यभावना, सामाजिक सुधारणा, समता आणि समानता यांबाबत कीर्तनाद्वारे प्रबोधन करून संतांनी त्या-त्या काळात समाजात परिवर्तन घडवून आणले आहे. हा वारसा आणि कीर्तनाची परंपरा पुढे नेण्याचा प्रयत्न आजही होतो आहे. कोणतीही माध्यमे नसतानाही टिकून राहिलेली ही परंपरा आज माध्यमांची मुबलक उपलब्धता असतानाच्या काळात तर जोरकसपणे पुढे सुरू राहिली आहे. मात्र, कीर्तनांमधील आशयात काळानुरूप बदल होण्याची आवश्यकता आहे. विज्ञान आणि तंत्रज्ञानाच्या क्षेत्रातील क्रांतीमुळे अनेक भाबड्या समजुती आणि जुन्या रुढी, चालीरीती बदलण्याची गरज आहे. जुन्या पुराणांत आहे म्हणून त्यांमधील अंधश्रद्धांना खतपाणी घालण्याऐवजी नव्या ज्ञानाचा हवाला देत त्या दूर करण्याचा प्रयत्न होण्याचीही गरज आहे. त्याचबरोबर स्त्री-पुरुष समानता, मानवतामूल्ये, राज्यघटनेतील तत्त्वे यांवरही जोर द्यायला हवा. असा आशय असलेली कीर्तने काळानुरूप म्हणता येईल. आपल्या कीर्तन परंपराही याच प्रकारची आहे. इंदोरीकर महाराजांनी कीर्तनात आपली शैली निर्माण केली असून, त्यांचा असा चाहता वर्ग आहे. या वर्गात स्वाभाविकच त्यांचा मोठा प्रभाव आहे. आगळ्या शैलीमुळे त्यांच्या कीर्तनाच्या व्हिडिओ सोशल मीडियावर मोठ्या प्रमाणावर पाहिल्या जातात. त्यामुळे ते जे सांगतील ते खरे मानले जाण्याची शक्यता आहे. वैज्ञानिकदृष्ट्या चुकीचे, तसेच पितृसत्ताक समाजाला बळ देणारे विधान करण्याने पुरुषी मानसिकता वाढण्याचाच धोका असतो. आपला मोठा चाहता वर्ग असलेल्या आणि प्रबोधनावरच भर देत असल्याचे सांगत असलेल्या इंदोरीकर महाराजांनी हे लक्षात घेऊन अधिक काळजी घ्यायला हवी.
आता पडदा टाका!
मुलगा आणि मुलगी यांच्या जन्माबाबत वैद्यकीय तथ्याला छेद देणारे आणि अंधश्रद्धेला खतपाणी घालणारे वक्तव्य केल्याने वादाच्या भोवऱ्यात अडकलेल्या निवृत्ती ...
महाराष्ट्र टाइम्स.कॉम 20 Feb 2020, 4:00 am