अमेरिकेतील उद्योजक आणि भविष्यकालीन तंत्रज्ञानावर काम करणारे संशोधक-तंत्रज्ञ इलॉन मस्क यांच्या प्रत्येक नवीन उपक्रमाप्रमाणेच त्यांनी लावलेल्या पैजेची जोरदार चर्चा सगळीकडे सुरू आहे. एकीकडे त्यातील अशक्य वाटणाऱ्या डेडलाईनची चर्चा आहे तर दुसरीकडे यापूर्वी हुकलेल्या त्यांच्या अंतिम मुदतीची अनेक उदाहरणांची मस्क यांनी दक्षिण ऑस्ट्रेलियात जगातील सर्वांत मोठी बॅटरी बांधण्याचे आव्हान स्वीकारले असून ही १०० मेगावॅट क्षमतेची बॅटरी केवळ १०० दिवसांत पूर्ण करावी लागणार आहे. या मुदतीत हा महाकाय प्रकल्प पूर्ण झाला नाही तर त्याचा संपूर्ण खर्च स्वतःच्या खांद्यावर घेऊन तो मोफत पूर्ण करून देण्याचे आव्हान मस्क यांनी स्वीकारले आहे. एका शंकेखोराने ट्विटरवरून या विशाल प्रकल्पाची वेळेत पूर्तता करण्याची मस्क यांची क्षमता आहे का, अशी शंका व्यक्त केली असता त्यांनी उत्तरादाखल ही घोषणा केली आहे. ‘पेपल’ हे ऑनलाईन पेमेन्ट तंत्रज्ञान विकसित करण्यापासून आता मंगळ ग्रहावर मानवी वस्ती उभारण्यापर्यंत मस्क यांनी अनेक चित्तथरारक घोषणा आजवर केल्या आहेत. त्यांची टेस्ला ही मोटर कंपनी इलेक्ट्रिक कार बनवते. त्यांनी आधी घोषणा केलेल्या मुदतीपेक्षा तीन वर्षे उलटून गेल्यावर कारची निर्मिती झाली. तीच गत अंतराळ पर्यटनाची होऊ शकते. त्याचीही पूर्तता मुदतीत होईल का, याबद्दल शंका उपस्थित केली जात आहे. पुढच्या वर्षी दोन अंतराळ पर्यटकांना ते घेऊन जाणार आहेत. त्यामुळे केवळ १०० दिवसांत १०० मेगावॅटचा हा प्रकल्प पूर्ण होईल का, अशी शंका येणे चूक नाही. काहींच्या मते हे त्यांचे वेळेत गोष्टी पूर्ण करण्यासाठीचे महत्त्वाचे तंत्र आहे. हा सगळा खर्च आपल्या अंगावर येईल, याचा दबावच मुदतीत प्रकल्प पूर्ण करण्यास पुरेसा असेल. त्यांनी आपल्या विद्युत मोटारीसाठी तसेच सौर उर्जेच्या साठवणीकरिता कार्यक्षम बॅटरी निर्माण केली आणि त्याचा कारखानाही काढला. मात्र ऑस्ट्रेलियातील हा प्रकल्प त्यांच्या कारखान्याच्या क्षमतेच्या तिप्पट मोठा आहे. म्हणून मस्क यांनी त्यासाठी फ्रेंच कंपनीची मदत घेण्याची घोषणा केली आहे. अर्थात त्यांची पर्यायी योजना काय आहे आणि माणसांच्या क्षमतेचा हिशोब चुकला तर काय, आदी प्रश्न अनुत्तरित आहेतच. असे असले तरी द्रष्टे उद्योजक असणाऱ्या मस्क यांच्या या पैजेच्या विड्याचे कुतूहल जगाला पुढचे १०० दिवस नक्कीच राहणार.
पैजेचा विडा
Maharashtra Times 10 Jul 2017, 4:00 am