आजारी माणसांवर उपचार होऊन ती बरी व्हावीत, यासाठी त्याचे नातेवाईक सर्वतोपरी प्रयत्न करतात आणि त्यासाठी आर्थिक ओझे उचलण्यास नकार देत नाहीत. आपल्या मुलांना वाचवायचे असेल तर त्यासाठी पालक आपले सर्वस्व पणाला लावून त्यासाठी आर्थिक मदत उभी करतात. तथापि बड्या रुग्णालयांची व्यापारी प्रवृत्ती मात्र त्या भावनिक बंधांचे आर्थिक शोषण करण्याची असते. आद्या या एका सात वर्षांच्या डेंग्यूग्रस्त मुलीवरील अयशस्वी उपचारांनंतर गुरुग्राममधील फोर्टिस रुग्णालयाने दिलेले बिलही या जुलमी प्रवृत्तीचे द्योतक आहे. या मुलीला वाचविण्यासाठी तिच्या पालकांनी लाखो रुपये खर्च केले. मात्र, तिची मृत्यूशी झुंज अपयशी ठरली. रुग्णालयाने तिच्या पालकांच्या हाती ठेवलेल्या बिलाने त्यांना धक्काच दिला. फोर्टिस हॉस्पिटलने एकूण १८ लाख रुपयांचे बिल तिच्या पालकांच्या हातात दिले. त्यात आयसीयूत १५ दिवस उपचार घेतल्याचा खर्च तब्बल १६ लाख रुपये दाखवण्यात आला. म्हणजे रोजचा एक लाख रुपयांहूनही अधिक. रुग्णालये माणसांवर उपचार करताना कशी असंवेदनशील बनलेली आहेत आणि त्यांच्यात नफेखोर प्रवृत्ती कशी भिनलेली आहे, हेच या प्रकरणातून दिसून येते. तिच्या वडिलांनी दिलेल्या माहितीनुसार फोर्टिस रुग्णालयाने तिच्या मृत्यूबाबत काहीही सांगितले नाही. फोर्टिसमधून तिला पुढील उपचारांसाठी रॉकलॅण्ड रुग्णालयात हलवण्यात आल्यावर तिला तेथे मृत घोषित करण्यात आले. म्हणून मुलीवर उपचार करण्यात फोर्टिसने हलगर्जी केल्याचा आरोप तिच्या वडिलांनी केला आहे. मुलीचा मृत्यू आधीच झाला होता. मात्र, हॉस्पिटलने सांगितले नाही, असा त्यांचा आरोप आहे. आद्याला २७ ऑगस्टला खूप ताप आल्यावर दुसऱ्या दिवशी तिला रॉकलॅण्ड रुग्णालयात दाखल केले गेले. दोन दिवसांनी, म्हणजे ३१ ऑगस्टला तिला डेंग्यू झाल्याचे निष्पन्न झाले. तेथील डॉक्टरांच्या शिफारसीनुसार तिला गुरुग्रामच्या फोर्टिस रुग्णालयात हलविण्यात आले. तिला व्हेंटिलेटरवर ठेवण्यात आले. तीन दिवस ती बेशुद्ध होती. पण पाच दिवस झाले तरी डॉक्टर प्रकृतीबाबत काही सांगत नव्हते; तशात मुलीच्या मृत्यूच्या धक्क्याने गरोदर असलेल्या तिच्या आईचा गर्भपात झाला, असे तिच्या वडिलांचे म्हणणे आहे. ही घटना समाजमाध्यमांवर विजेच्या लोळासारखी पसरल्यानंतर केंद्रीय आरोग्यमंत्री जे. पी. नड्डा यांनी दखल घेतली आहे. अशा रुग्णालयावर कायद्याचा अंकुश हवा आणि कठोर कारवाई व्हायला हवी. अशा असंवेदनशील प्रवृत्तीवर कायद्याचा चापच परिणामकारक ठरू शकतो.
कायद्याचा चाप हवा
आद्या या एका सात वर्षांच्या डेंग्यूग्रस्त मुलीवरील अयशस्वी उपचारांनंतर गुरुग्राममधील फोर्टिस रुग्णालयाने दिलेले बिलही या जुलमी प्रवृत्तीचे द्योतक आहे.
Maharashtra Times 22 Nov 2017, 1:33 am