स्वाईनचा वाढता धोका

हवामान बदल कोणते संकटं घेऊन येऊ शकतो याचा ट्रेलर यंदाच्या तापदायक हिवाळ्याने दाखविला. अवघ्या दीड महिन्यात राज्यात स्वाईन फ्ल्युने सतरा जणांचा मृत्यु झाला तर, अजूनही दहा रुग्णांचा जीवन संघर्ष चालू आहे. हवामान बदलामुळे स्वाईन फ्ल्युचा प्रादुर्भाव झाल्याचा दावा आरोग्यमंत्र्यांनी केला आहे. या ४५ दिवसांच्या कालावधीत साडेतीन लाख रुग्ण तपासण्यात आले यावरुन स्वाईनचा धोका लक्षात यावा. यंदा थंडीने बरीच ये जा केली. थंडी अन् उन्हाळ्याचा एकाचवेळी अनुभव आला. तापमानाने जुने विक्रम मोडीत काढले तर एकाच दिवसात तापमान पाच ते सहा अंशानी कमी जास्त झाले. या तीव्र बदलामुळे अनेकांना या परिस्थितीशी जुळवून घेता न आल्याने रुग्णालये भरुन गेली. वास्तविक उन्हाळ्याच्या स्वागताच्या या काळात स्वाईन फ्ल्युचा विषाणू शक्यतो तग धरत नाही असे सांगितले जाते. पण, थंडीने आपला मुक्काम अचानक वाढविल्याने त्याला पोषक वातावरण मिळाले. नाशिक, पुणे, नागपूर, ठाणे व सोलापूर या मोठ्या शहरांमध्ये हा प्रादुर्भाव अधिक झाल्याचे दिसते. वेगाने वाढणारी ही शहरे नागरीकरण व औद्योगिकरणातही आघाडीवर असल्याने स्वाभाविकच प्रदूषणातही अग्रेसर आहेत. स्वाईन वा तत्सम साथरोगांसाठी अशी स्थिती म्हणजे नंदनवनच असते. नेमेचि येतो मग पावसाळा या उक्तीप्रमाणे गेली काही वर्षे स्वाईन, चिकुन गुन्या, डेंग्यु या साथरोगांनी उच्छाद मांडलेला आढळतो. पण या संकटाचा मुकाबला पाहिजे त्या पध्दतीने केला जात नाही. मुळात अस्वच्छता निवारण ऐरणीवर घेतांनाच जनजागृतीवर भर देणे व हे काम प्रासंगिक न ठेवता नित्यनेमाने करणे याला पर्याय नाही. वाढत्या नागरीकरणाला स्वच्छतेबरोबरच पर्यावरण स्नेहाची जोड दिली नाही तर अशा महामारीला सातत्याने तोंड द्यावे लागेल. म्हणूनच सावध ऐका पुढल्या हाका हाच या स्वाईनच्या अकाली येण्याचा संदेश आहे.