करोनामुळे सध्या कमालीची संभ्रमावस्था निर्माण झाली आहे. अतिदक्षता म्हणजेच खरी सजगता ही धारणाही या काळात दृढ होत आहे. भारतात जागरूकता सर्व पातळीवर झिरपली आहे काय, हा खरा प्रश्न आहे. कनिका कपूर या गायिकेने वस्तुस्थितीची जाणीव असतानाही जो आततायीपणा केला, त्याने भले भले संकटात सापडले आहेत. लंडनमधील स्थिती सध्या नियंत्रणाबाहेर गेली आहे. तिथून परतल्यानंतर चाचणी न करता विमानतळाबाहेर पडलेल्या कनिकामध्ये करोनाची लक्षणे आढळली. तोपर्यंत ती काही समारंभांमध्ये सहभागी झाली होती. तिच्या संपर्कात आलेल्या काहींची करोना चाचणी निगेटिव्ह आली असली तरी भीती कायम आहे. या निष्काळजीपणाने भीतीच्या छायेत ढकलल्या गेलेल्यांची संख्या वाढत आहे. स्वसुरक्षा हीच समाजसुरक्षा या जाणिवेचे विस्मरण झालेल्यांनीच करोनाच्या संकटात वाढ केली आहे. एकीकडे डॉक्टर, परिचारक, सुरक्षारक्षक आणि जीवनावश्यक सेवा पुरविणाऱ्यांचे प्रयत्न सातत्याने सुरू असतानाच, प्रतिष्ठितांच्या वर्तुळात वावरणाऱ्यांनी शंकांचे सावट गडद करावे ही बाब विलक्षण खटकणारी आहे. अशा पद्धतीच्या बेजबाबदार आणि असमंजस वागण्यासाठी आपण 'बेबी डॉल' नाही तर सुशिक्षित आहोत, याकडे कनिकाची डोळेझाक आक्षेपार्ह आहे. कनिकाविरुद्धचा देशातील आक्रोश संयुक्तिकच आहे. ती सध्या लखनौ येथील हॉस्पिटलमध्ये उपचार घेत आहे. या गायिकेविरुद्ध तक्रारही दाखल झाली आहे. करोनाचे संकट कदाचित टळेलही. चौकशीचा ससेमिरा मात्र टाळता येणार नाही. क्षणिक सोयीसाठी स्वत:सह इतरांचाही जीव धोक्यात घालण्याच्या या कृतीवर कनिकाच्या घरच्यांनीही पांघरूण घालण्याचा प्रयत्न अधिक आपत्तीजनक आहे. बुद्धीचा कौल न मानता निष्काळजीने निवडलेली चकाकत्या दुनियेतील झळाळी किती घातक ठरू शकते याचा धडा कनिका प्रकरणाने दिला आहे. दिखाऊगिरीपेक्षा दक्षता सरस ठरते हा बोध सर्वसामान्यांनीही यातून घ्यायला हवा.
बेजबाबदार बेबी डॉल
करोनामुळे सध्या कमालीची संभ्रमावस्था निर्माण झाली आहे अतिदक्षता म्हणजेच खरी सजगता ही धारणाही या काळात दृढ होत आहे...
महाराष्ट्र टाइम्स.कॉम 22 Mar 2020, 4:00 am