सुमारे ७० हजार डॉलर्स एवढी जाहिरातीची रक्कम भरल्यानंतरही अनेक पेजेस बंद झाले असतील तर संबंधितांची नामुष्की लक्षात घ्यायला हवी. निवडणुकीचा प्रचार टिपेला पोहचला असताना काँग्रेससारख्या प्रमुख राजकीय पक्षाच्या ६८७ पेजेसवर फेसबुकने ही कारवाई केला. त्याचे गांभीर्य त्यामुळेच अधिक आहे. फेसबुकने बनावट खात्यांचे कारण दिले आहे. काँग्रेसच्या कृत्यांवर अन्य पक्षांचे किती बारीक लक्ष होते हे यावरून सहज लक्षात येते. समाज माध्यमांचा कौशल्याने उपयोग करीत भाजपाने मागच्या लोकसभा निवडणुकीत विजय मिळविला. तो प्रकार आदर्श प्रचारपद्धतीत मोडणारा होता की नाही, याविषयी बराच वादंग झाला. पुढील काही वर्षांत त्यावर अधिकाधिक चर्चा झाली. स्वप्रतिमेचे उदात्तीकरण करण्याचा सर्वच व्यक्ती, संघटना, संस्था किंवा पक्षांना अधिकार आहे. समाज माध्यमात मात्र प्रतिस्पर्ध्याला गलितगात्र करून सोडण्याची पद्धतशीर मोहीम राबविण्यात आली. विरोधी नेत्यांची बावळट, नेभळट आणि पुरेशी बुद्धिहीन प्रतिमा रंगविण्याचे कामही समाज माध्यमांनी केले. या पार्श्वभूमीवर अलीकडील निवडणुकीत सर्वच पक्षांचा कसून सराव दिसतोय. 'दिखता है, वो बिकता है' या न्यायाला तर्कसंगत ठरविण्याच्या खटाटोपातून अलीकडे बहुतेक सर्व पक्षांच्या प्रचाराची पातळी खालावली. ही कारवाई अनधिकृत वर्तवणुकीमुळे केली असल्याचे स्पष्टीकारण फेसबुकने दिले. हा एकप्रकारे मुखभंगच ठरतो. या अनधिकृत कृत्यांची अधिकृत तक्रार फेसबुककडे करण्यात आली असावी. या प्रचाराचे सूक्ष्मपणे गंभीर अध्ययन करणारी यंत्रणा काँग्रेसविरोधातील मोठ्या पक्षाकडे सक्रिय होती, असा याचा अर्थ निघतो. देशात २० कोटी लोक फेसबुकवर आहेत. सर्व मतदार तसेच राजकीय जाहिरातदारांनी विवेकाचे भान ठेवण्याचा इशारा म्हणून या कारवाईकडे बघायला हवे. अर्थात, हा न्याय अतिशय व्यक्तिगत माहिती परस्पर विकणाऱ्या फेसबुकसारख्या कंपन्यांनाही लागू होतो.
काँग्रेसचा मुखभंग!
सुमारे ७० हजार डॉलर्स एवढी जाहिरातीची रक्कम भरल्यानंतरही अनेक पेजेस बंद झाले असतील तर संबंधितांची नामुष्की लक्षात घ्यायला हवी...
MT 3 Apr 2019, 3:34 am