बांधकाम व्यावसायिकांच्या चुकांमुळे गृहप्रकल्प रखडल्याने ग्राहक आर्थिक संकटे आणि कर्जांच्या गर्तेत आहेत. अशावेळी आयुष्यभर साठविलेली पुंजी अडकलेली, घरही ताब्यात नाही आणि दुसरीकडे कर्जांचे हप्ते सुरू अशा तिहेरी अडचणींचा सामना करावा लागतो. आता परस्परांच्या मदतीने प्रकल्प पूर्ण करण्याचा एक प्रयोग तळेगावमध्ये होतो आहे. तेथील रखडलेला 'डीएसके सदाफुली' हा प्रकल्प पूर्ण करण्याची ग्राहकांनी घेतलेल्या पुढाकाराकडे एक प्रयोग म्हणून पाहायला हवे. 'महारेरा' कायद्यातील तरतुदींनुसारच होणाऱ्या या प्रयोगाला यश मिळाल्यास राज्याचीस अनेक ग्राहकांसाठी तो आशेचा किरण ठरेल. आर्थिक अडचणीनंतर काही बांधकाम व्यावसायिक प्रकल्प अर्धवट सोडतात. व्यावसायिकांना तुरूंगात टाकले असले, तरी त्यामुळे ग्राहकांना घरे मिळणार नाहीत. घरासाठी भरलेले पैसेही अडकले, प्रत्यक्षात घराचा ताबाही नाही आणि दुसरीकडे बँकांचा कर्जवसुलीसाठी तगादा, हे दुष्टचक्र कोठेतरी भेदण्याची गरज होती आणि 'महारेरा'ने हीच संधी उपलब्ध करून दिली आहे. तळेगाव येथील प्रकल्पासाठी मुंबई ग्राहक पंचायतीच्या मार्गदर्शनाखाली काही ग्राहकांनी पुढाकार घेतला आहे. प्रकल्पाची सद्यस्थिती, ग्राहकांनी गुंतविलेले पैसे, आर्थिक संस्थांचा सहभाग अशा सर्व बाबींचा विचार करून ८० ते ९० टक्के काम झालेला हा प्रकल्प पूर्ण करण्याचा निर्णय त्यांनी घेतला आहे. यासाठी १३१ ग्राहकांनी सहकारी गृहनिर्माण संस्थेची स्थापना करण्यात आली आहे. महारेराने दिलेल्या आदेशानुसार या प्रकल्पाची पूर्वीची नोंदणी रद्द करून तो या सोसायटीकडे सुपूर्द करण्यात येत आहे. यासाठी बांधकाम व्यावसायिक आणि ग्राहक पंचायतीच्या प्रतिनिधींचे तज्ज्ञांचे पॅनेलही नियुक्त करण्यात आले आहे. अन्य कोणी मदतीला धावून येण्याची शक्यता नसताना ग्राहकांनीच पुढाकार घेण्याचा हा पहिलाच प्रयोग असल्याने तो पूर्ण करताना वेगवेगळ्या अडचणींचा सामना करावा लागेल. मात्र, या प्रयोगाच्या यशाकडे राज्यातील हजारो ग्राहक डोळे लावून बसले आहेत. याला यश मिळाल्यास अनेकांसाठी प्रकल्प पूर्ण करण्याचे प्रारूप विकसित होईल.
स्वागतार्ह प्रयोग
बांधकाम व्यावसायिकांच्या चुकांमुळे गृहप्रकल्प रखडल्याने ग्राहक आर्थिक संकटे आणि कर्जांच्या गर्तेत आहेत...
महाराष्ट्र टाइम्स 6 Nov 2019, 4:36 am